Աշխատավարձերի, կենսաթոշակների բարձրացման և նորաստեղծ ընտանիքներին բնակարաններով ապահովելու մասին Սամվել Բաբայանի հնչեցրած խոստումները համարում եմ հիմնազուրկ արտահայտություններ, և կարծում եմ, սեփական ժողովրդին մոլորեցնելու միջոցով քաղաքական դիվիդենտներ շահելն ազնիվ չէ:
Աշխատավարձերի, կենսաթոշակների բարձրացման մասին Սամվել Բաբայանի հնչեցրած խոստումները հիմնազուրկ են. ֆինանսների նախարարը փաստարկներ է ներկայացնում
ՍՏԵՓԱՆԱԿԵՐՏ, 31 մայիսի, ԱՐՑԱԽՊՐԵՍ: Այս մասին ԱՀ ֆինանսների նախարար Արթուր Հարությունյանն ասել է 2018 թվականի պետական բյուջեի կատարման հաշվետվության վերաբերյալ Արցախի հանրային հեռուստատեսության «Օր» լրատվական ծրագրին տված հարցազրույցի ժամանակ:
«Ես նշել եմ, որ մեր ընդհանուր բյուջեի մուտքերը կազմել են 105,7 մլրդ դրամ: Դրանից 52,6 մլրդ դրամն ուղղվել է աշխատավարձերի, կենսաթոշակների և նպաստների վճարմանը: Այդ թվում՝ 33,9 մլրդ կազմել է աշխատավարձը, 12,6 մլրդ՝ կենսաթոշակները և 6,1 մլրդ՝ նպաստները: Ըստ Սամվել Բաբայանի հայտարարությունների՝ մենք միջին կենսաթոշակներ պիտի ունենանանք 82,420 հազար դրամի սահմաններում, եթե հաշվենք, այսօրվա գործող միջին 43,200 հազար դրամ կենսաթոշակներին հատկացվող 12 մլրդ 612.6 մլն դրամին պետք է լրացուցիչ ավելացնենք 11,4 մլրդ դրամ կենսաթոշակ: Ինչ վերաբերում է աշխատավարձերին, ապա ըստ նրա, հավաքարարները պետք է ստանան 147 հազար դրամ աշխատավարձ՝ այսօրվա 70 հազար դրամի փոխարեն: Այսինքն, դրանից ելնելով, համաչափ պետք է բարձրացնենք պետական հաստատություններում աշխատողների աշխատավարձերը շուրջ 2,1 անգամ՝ 70-ի ու 147-ի հարաբերակցությամբ ,և գործող 33,9 մլրդ դրամին ևս պետք է ավելացնենք 31,6 մլրդ դրամ (առանց բարձրաստիճան պաշտոնատար անձանց աշխատավարձերի բարձրացման):
Եվ եթե դրանից տեսականորեն առանձնացնենք եկամտային հարկը, որը կազմում է 21 տոկոս ևորը, չգիտեմ ինչու , Սամվել Բաբայանի կողմից համարվում էր թոշակառուի ֆոնդ,, ստացվում է, փաստացի բյուջեից պետք է ծախսենք 25 մլրդ: Այսինքն ևս 25 մլրդ դրամ մեզ պետք է աշխատավարձերի լրացուցիչ բարձրացման համար: Ինչ վերաբերում է նորաստեղծ ընտանիքների բնակարանների անվճար տրամադրման մասին նրա հնչեցրած հայտարարություններին, ապա վերջին 3 տարիների ընթացքում միջին վիճակագրական տվյալներով տարեկան ունենք 860 ամուսնացող զույգ: Յուրաքանչյուր բնակարանի համար իր կահավորանքով, կենցաղային տեխնիկայով ու նվազագույն ապրելու պայմաններով կառուցման կամ ձեռք բերման համար անհրաժեշտ է 20 մլն դրամ: Հետևաբար այս ծրագրի համար մեզ պետք է ևս 17 մլրդ 200մլն դրամ, որպեսզի կարողանանք այդ 860 նորաստեղծ ընտանիքներին ապահովել բնակարաններով: Այս երեք թվերը եթե գումարենք ստացվում է, որ մեզ պետք է 25 մլրդ աշխատավարձի համար, 11,4 մլրդ թոշակների համար և 17,2 մլրդ բնակարանների և բնակելի տների ձեռքբերման համար: Եթե դրանք գումարենք այսօվա գործող 52,6 մլրդ դրամ աշխատավարձերին ու թոշակներին, ստացվում է, որ մեր ընդհանուր ծախսերը կազմում են 106.2 մլրդ դրամ: Իսկ մեր բյուջեն, ընդհանուր առմամբ, 105,7 մլրդ է կազմում:
Այս հայտարարություններով եթե առաջնորդվենք ու համարենք իրատեսական, ապա ստացվում է, որ մեր բյուջեի մնացած ծրագրերը՝ կրթության, առողջապահության, անվտանգության, մշակույթի, կապիտալ ներդրումների, ենթակառուցվածքների կառուցման և մի շարք բազմաթիվ ծրագրեր չպետք է իրականացնենք, այլ միայն իրականացնենք 3-4 ծրագրերի ծախսեր՝ տանք աշխատավարձեր, կենսաթոշակներ, նպաստներ և նորաստեղծ ընտանիքներին՝ բնակարաններ: Իսկ մնացած խոստումները նույնպես անիրատեսական են՝միտված այս ժամանակաշրջանում քաղաքական դիվիդենտներ հավաքելուն:Ուզում եմ նշել, որ տարբեր կուսակցությունների, հասարակական քաղաքական գործիչների կողմիցարված բոլոր գայթակղիչ հայտարարությունները անարձագանք չեն մնալու ֆինանսների նախարարության կողմից , եթե դրանք վերաբերում են պետական ֆինանսների կառավարման ոլորտին և իրականության հետ որևէ կապ չունեն:
Ընդհանրապես աշխատավարձերի, կենսաթոշակների և այլ վճարների մասով մենք գտնվում ենք ՀՀ-ի հետ մեկ միասնական դաշտում և առանձին, ինքնուրույն բարձրացումների մասին խոսելը իրատեսական չէ: Այսօր աշխատավարձների բարձրացման մասով կան ՀՀ-ում հայտարարություններ բանակի զինծառայողների, ուսուցիչների աշխատավարձերը բարձրացնելու մասին և մենք էլ այդ բարձրացումներին համահունչ իարականացնում ենք այդ գործընթացները»,- ասել է Ա. Հարությունյանը: