Այսօր՝ հունիսի 1-ին, ««Որոշում» քաղաքացիական նախաձեռնություն» հասարակական կազմակերպության նախաձեռնությամբ Գանձասարի վանական համալիրին հարակից «Հացատուն» էթնո-մշակութային շենքի տարածքում կայացել է տոնական միջոցառում և թոնրահացի մրցույթ-փառատոն՝ նվիրված երեխաների պաշտպանության միջազգային օրվան:
Գանձասարում կայացել է թոնրահացի մրցույթ-փառատոն
ՍՏԵՓԱՆԱԿԵՐՏ, 1 հունիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ տոնական միջոցառումն ուղեկցվել է Շուշիի Խաչատուր Աբովյանի անվան հիմնական դպրոցի նախադպրոցական տարիքի խմբի երեխաների ասմունքներով, հայրենասիրական երգերով ու պարերով:
Գանձասարի վանքի հոգևոր հովիվ, հոգեշնորհ Սահակ վարդապետ Շաքարյանի ձեռամբ կատարվել է թոնրահացի խմորի օրհնության կարգ: Նա ողջ աշխարհի երեխաներին մաղթել է ուրախ և անհոգ մանկություն՝ խաղաղ երկնքի տակ և նշել, որ Աստված առանձնահատուկ սիրով է լցված երեխաների հանդեպ:
Հնչեցնելով բարի խոսքեր ու օրհնանքներ, պատմելով բազմաթիվ ավանդազրույցներ թոնրատան ու թոնրահացի մասին՝ ««Որոշում» քաղաքացիական նախաձեռնություն» հասարակական կազմակերպության անդամները թխել են թոնրահացը:
Մեզ հետ զրույցում ՀԿ նախագահ Արթուր Հայրապետյանն ասել է, որ միջոցառման նպատակն է նպաստել Արցախում հայ ազգային ավանդույթների տարածմանն ու ինքնագիտակցության բարձրացմանը:
«Մենք մեր նախնիներից ստացել ենք հարուստ մշակութային ժառանգություն, և մեր պարտքն ու պարտականությունն է այն պահել, պահպանել և փոխանցել գալիք սերունդներին:Թոնիրն ու թոնրահացը արցախյան մշակութային կյանքում սրբազան նշանակություն ունեն: Դրանք ոչ նյութական մշակութային ժառանգության բացառիկ բաղադրիչներից են, որոնք խորհրդանշում են արցախահայերի բնիկ ժողովուրդ լինելը:Վերադառնալով մեր ազգային արժեքներին՝ մենք հնարավորինս մոտ կլինենք մեր արմատներին: Ճանաչելով է սկսվում սերը հայրենիքի հանդեպ,իսկ ճանաչելով հայրենիքը , մենք կբացահայտենք ինքներս մեզ»,-ասել է Ա. Հայրապետյանը: