ՍՏԵՓԱՆԱԿԵՐՏ, 4 հունիսի, ԱՐՑԱԽՊՐԵՍ: «Արցախպրես»-ի  թղթակցի   հաղորդմամբ՝  առաջին խաղակեսին  առաջին  գոլը  8-րդ  րոպեին   խփել  է  Աբխազիայի  հավաքականի  7-րդ  համարի  ներքո   խաղացող  Շաբաթ Լոգուան, իսկ   երկրորդը՝  32-րդ   րոպեին  Արցախի  թիմի  20-րդ   համարի  խաղացող  Նորիկ  Մկրտչյանը:

Արցախ-Աբխազիա    խաղն  ավարտվել  է   ոչ  ոքի՝  1:1  հաշվով:

Մեզ  հետ  զրույցում   ConiFA-2019  մրցավարների  կառավարիչ   Դենիս  Վոլն  ասել է, որ խաղերը  կազմակերպված են   բարձր  մակարդակով,  նկատելի  էր  երկրպագուների ակտիվությունը:

Խոսելով  Արցախ-Աբխազիա    հավաքականների   խաղի մասին՝   նա  ասել է, որ  այն  անցել  է  շատ  արդար, առանց  խախտումների  ու հետաքրքիր. մարզիկներն իրար  հանդեպ ցուցաբերել են հարգալից  վերաբերմունք:

Ըստ  Դենիս  Վոլի՝   իրենք   շատ  են  հավանել   Արցախը, ինչպես  նաև  հյուրընկալ  ու  հյուրասեր արցախցիներին:

Ֆուտբոլի Արցախի հավաքականի գլխավոր մարզիչ Սլավա Գաբրիելյանի  խոսքով՝  Արցախ-Աբխազիա  խաղն  անցել է   թեժ պայքարում, սակայն ցանկալի արդյունքի չենք հասել:

«Պետք  է  շատ   ժամանակ  հատկացնեինք  մրցակից  թիմի     կիսադաշտում, գրոհներ    կազմակերպեինք, որն էլ ընդհանուր առմամբ ստացվել է, այսինքն մեր  թիմը,  ի  տարբերություն Աբխազիայի,  բավականին  լավ  է   խաղացել, բայց հաղթանակ չենք կարողացել ապահովվել»,- նշել է Գաբրիելյանը՝ ընդգծելով, որ անգամ ոչ ոքին ոչ մի հնարավորություն չի թողել Արցախի հավաքականին կիսաեզրափակիչ փուլ անցնելու համար:

Արցախի  թիմի  20-րդ   համարի  խաղացող  Նորիկ  Մկրտչյանն էլ  ասել է, որ   իր  համար  մեծ   պատիվ  է  հայրենի   Մարտունի  քաղաքում  գոլի  հեղինակ   դառնալը: Նա    շնորհակալություն է հայտնել  բոլոր  այն  երկրպագուներին, ովքեր  սրտացավ ողջունում  էին  իրենց  խաղի  ցանկացած   հաջողություն: Սպորտը   խաղ  է, որտեղ  լինում  են  և´   հաղթողներ  և´   պարտվողներ,  և  չպետք  է   ընկճվել, այլ   խաղերից  պետք  է  դասեր  քաղել  ու   միշտ   ձգտել  հասնել առավելագույնի:

Աբխազիայի   հավաքականի  գլխավոր  մարզիչ  Բեսլան Ադժինժալն  էլ  ասել է, որ     այն   նպատակները, որոնք  իրենք  ունեին  խաղերից  առաջ  փորձում  են հերթականությամբ  իրականացնել: 

«Մեզ  համար   շատ   հաճելի  է  լինել  Արցախում՝   կարծելով, որ  Աբխազիայում  ենք, որովհետև   այստեղ   ժողովուրդը, մեր   թիմի  երկրպագուները  շատ  ջերմ  են: Հուսով  ենք՝ այս   առաջնությունն  Արցախին  ու  Աբխազիային    միջազգային  ճանաչում   կբերի»,-ավելացրել  է  Բ. Ադժինժալը:

Աբխազիայի հավաքականի 7-րդ  համարի  ներքո   խաղացող  Շաբաթ Լոգուանի  կարծիքն  էլ  հետևյալն  է. «Մենք  շատ  ուրախ  ենք, որ    հայտնվելու  ենք  կիսաեզրափակչում: Խաղն   անցել  է   շատ    լարված,  բայց  և  հետաքրքիր, քանի որ  Արցախի  թիմը  լավ  պատրաստված էր: Մենք    շատ  ուրախ ենք, որ  այստեղ  ունենք   երկրպագուներ, ովքեր  մեզ   օգնում են, որպեսզի  մենք   հաղթենք:  Մենք  կարդարացնենք մեր  երկրպագուների  հույսերը»:

Արցախ-Աբխազիա  հավաքականների   խաղին  ներկա  էին  ԱՀ  պետական  նախարար Գրիգորի  Մարտիրոսյանը, «Ազատ  հայրենիք»  կուսակցության   նախագահ  Արայիկ  Հարությունյանը, պետական  այրեր, հյուրեր արտերկրից, լրագրողներ, ֆուտբոլասերներ: