ՍՏԵՓԱՆԱԿԵՐՏ, 4 հունիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` ասուլիսին Արմեն Գարամյան ասել է, որ Մարտունիում կայացած Արցախ-Աբխազիա խաղն ավարտվել էր 1-1 հաշվով: Նրա խոսքով` Արցախի հավաքականը շատ լավ սկսել էր խաղը, հենց սկզբից նետվել գրոհների ու կարող էր բացել հաշիվը: Գրոհներից մեկի արդյունքում, Աբխազիան օգտվելով Արցախի հավաքականի պաշտպան Արամ Կոստանդյանի սխալից, բացեց խաղի հաշիվը: Մնացած ժամանակահատվածում Արցախն անընդհատ գրոհում էր, չնայած երրորդ օրն անընդմեջ անց էր կացնում հանդիպում: Թիմերն ընդմիջման գնացին 1-1 հաշվի պայմաններում: Առաջին խաղակեսի վերջնամասում Նորիկ Մկրտչյանը հավասարեցրեց հաշիվը: Չնայած երկրորդ կեսում Արցախը փորձում էր փրկել խաղը, սակայն այն հենց այդպես էլ ավարտվեց:

Մարտակերտում կայացած Չամերիա-Սապմի խաղն ավարտվել էր 4-0 հաշվով: Չամերիայի հավաքականը առաջին գոլը խփել է խաղից 5 րոպե անց: Ասկերանում տեղի ունեցած Հարավային Օսիա-Սեկեյի Լանդ խաղն ավարտվել է 2-2 հաշվով: Ստեփանակերտում կայացած Պադանիա-Արևմտյան Հայաստան խաղն ավարտվել է 1-1 հաշվով, և ոչ ոքին Արևմտյան Հայաստանի հավաքականին բավարարել է կիսաեզրափակչում հայտնվելու համար:

Ընդհանրացնելով արդյունքները`  CONIFA Artsakh-ի PR և մարքեթինգի թիմի ղեկավար Հրաչուհի Բարսեղյանն ասել է, որ Ա խմբից Աբխազիան ունի 7, Չամերիան` 6, Արցախը` 4, Սապմի` 0 միավոր: Բ խմբից Հարավային Օսիան ունի 7, Արևմտյան Հայաստանը` 4, Պադանիան` 4, Սեկեյի Լանդը` 1 միավոր:

Այսպիսով` Աբխազիան և Արևմտյան Հայաստանը կխաղան առաջին կիսաեզրափակչում: Խաղը տեղի կունենա Ստեփանակերտի Ստեփան Շահումյանի անվան հանրապետական մարզադաշտում, հունիսի 6-ին` ժամը 18:30-ին: Հարավային Օսիան և Չամերիան նույն օրը` ժամը 16:00-ին կխաղան Ասկերանի մարզադաշտում: Երկրորդ կիսաեզրափակչում Արցախ-Սեկեյի Լանդը խաղը տեղի կունենա հունիսի 6-ին` ժամը 18:30-ին, Մարտունու մարզադաշտում, իսկ Պադանիա-Սապմի խաղը` նույն օրը` ժամը 18:30-ին, Մարտակերտի մարզադաշտում:

Հ. Բարսեղյանի խոսքով` հունիսի 6-ին սպասվում են դիտարժան խաղեր: Իսկ հունիսի 5-ին խաղեր չեն լինելու: Կլինեն մշակութային մի շարք ծրագրեր Շուշիում: