Հայաստանի ավանդական ուշուի ֆեդերացիայի նախաձեռնությամբ և ԱՀ կրթության, գիտության և սպորտի նախարարության աջակցությամբ հունիսի 7-9-ը Երևանում տեղի է ունեցել ուշուի ՀՀ բաց առաջնություն, որին ներկայացված էր նաև ԱՀ ուշու քունգ ֆուի ֆեդերացիայի հավաքական թիմի շուրջ 45 մարզիկ:
Արցախցի մարզիկներն ուշուի ՀՀ բաց առաջնությունում գրավել են մրցանակային տեղեր
ՍՏԵՓԱՆԱԿԵՐՏ, 11 հունիսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է ԱՀ ուշու քունգ ֆուի ֆեդերացիայի գլխավոր մարզիչ Դավիթ Գրիգորյանը` նշելով, որ մասնակիցներից երկուսը ներկայացել են թաոլու մարզաձևից:
Նրա խոսքով՝ առաջնությանն արցախցի մարզիկները գրավել են 17 առաջին տեղ, չորս՝ երկրորդ և 8՝ երրորդ: Թաոլու մարզաձևի երկու մասնակիցներն ընդգրկվել են Հայաստանի թաուլո հավաքականի կազմում և 2020 թվականին մասնակցելու են Եվրոպայի առաջնություններին: Առաջնության արդյունքները գոհացուցիչ են:
Դ. Գրիգորյանը տեղեկացրել է, որ առաջնության շրջանակներում ընտրվել է հավաքական թիմ՝ ուշուի աշխարհի 2019 թվականի առաջնությանը մասնակցելու համար. այն տեղի կունենա հոկտեմբերի 17-23-ը Չինաստանի Շանհայ քաղաքում:
«Հհավաքականի կազմում ԱՀ ուշու քունգ ֆուի ֆեդերացիայից ընդգրկվել են մարզիկներ՝ Արսեն Բաղրյանը՝ մինչև 52 կգ քաշային կարգում, Հայկ Խաչիյանը մինչև 65 կգ-ում և Դավիթ Կասումյանը՝ 80կգ քաշայինում: Աշխարհի առաջնության մասնակցության հավակնորդ, հավաքական թիմի մարզիկ Հայկ Գասպարյանը վնասվածքի պատճառով չի կարողացել մասնակցել առաջնությանը, ուստի, ՀՀ ավանդական ուշուի ֆեդերացիայի որոշման համաձայն՝ որոշակի ժամկետում նա կմասնակցի նախընտրական մենամարտերի և համապատասխան արդյունքներ ցուցաբերելու դեպքում՝ ինքը ևս կընդգրկվի հավաքականի կազմում»,-մասնավորապես ասել է Դ. Գրիգորյանը:
