Ստեփանակերտի մշակույթի և երիտասարդության պալատում կայացել է «Հայաստանի փոքրիկ երգիչներ» երգչախմբի մենահամերգը:
Ստեփանակերտում կայացել է աշխարհի լավագույն երգչախմբերից մեկը ճանաչված «Հայաստանի փոքրիկ երգիչներ»-ի համերգը
ՍՏԵՓԱՆԱԿԵՐՏ, 14 հունիսի, ԱՐՑԱԽՊՐԵՍ: Համերգը կազմակերպվել է Երևանի քաղաքապետ Հայկ Մարությանի գլխավորած պատվիրակության այցի շրջանակներում:
«Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել Երևանի քաղաքապետ Հայկ Մարությանը:
Նա ասել է, որ ինքն առաջին անգամ չէ Արցախում: Նա միշտ էլ դրական լիվքերով ու լավ հիշողություններով է վերադարձել Երևան:
Երևանի քաղաքապետն իր ելույթում մասնավորապես ասել է. «Առաջին անգամ եմ պաշտոնական այցով գտնվում Արցախում: Շատ ուրախ եմ, որ կրկին մեր արևելյան մայրաքաղաքը տեսնում եմ պայծառ, մաքուր և ամենակարևորը՝ անամպ երկնքի տակ: Մենք Արցախի հերոս ժողովրդի ջերմությունն ու բարությունը պետք է փոխանցենք երևանաբնակ մեր եղբայրներին ու քույրերին: Մեր համագործակցության շրջանակներում մ պարբերաբար ունենում ենք փոխայցելություններ, իրականացնում կառուցապատման և բարեկարգման ծրագրեր, կազմակերպում մշակութային և սպորտային մի շարք միջոցառումներ: Առավել ուրախ եմ, որ այդ միջոցառումներն ավելի են խորանում և արդեն միջազգային մասշտաբներ են ձեռք բերում»:
Հ. Մարությանն ավելացրել է, որ մի քանի շաբաթ հետո Երևանն ընդունելու է ֆուտբոլի մինչև 19 տարեկանների Եվրոպայի առաջնության մասնակիցներին: Այդ միջոցառումը Երևանի համար լինելու է խոշոր իրադարձություն:
Անդրադառնալով Արցախում անցկացված ConiFA-2019 ֆուտբոլի Եվրոպայի առաջնությանը՝ Երևանի քաղաքապետն ընդգծել է, որ այն կազմակերպվել է բարձր մակարդակով, որի ընթացքին իրենք հետևել են մեծ ոգևորությամբ: Ինքն ուրախ է, որ Համահայկական 7-րդ խաղերը ևս կայանալու են Արցախի հյուրընկալ հողում:
Համերգին երգչախումբը կատարել է հոգևոր, միջնադարյան, վերածննդի, ինչպես նաև դասական, ժամանակակից, ժողովրդական և հանրամատչելի ստեղծագործություններ:
Համերգից հետո «Հայաստանի փոքրիկ երգիչներ» երգչախմբի հիմնադիր, գեղարվեստական ղեկավար և խմբավար Տիգրան Հեքեքյանը մեզ հետ զրույցում ասել է, որ երգչախումբը հիմնադրվել է 1992 թվականի նոյեմբերին։Նրա խոսքով՝ երգչախումբը միջազգայինմի շարք մրցույթների դափնեկիր է. երգչախումբն արժանացել է նաև «Եվրոպայի մշակույթի դեսպան» տիտղոսաին: Երգչախումբն ակտիվ գործունեություն է ծավալում Հայաստանում և արտերկրում։ Մասնակցում է միջազգային փառատոների, մեծ նշանակություն ունեցող պետական ծրագրերի և բարեգործական համերգների։ Երգչախմբային արվեստի համաշխարհային ֆեդերացիայի կողմից «Հայաստանի փոքրիկ երգիչներ» երգչախումբը ճանաչվել է աշխարհի լավագույն երգչախմբերից մեկը։
Միջոցառմանը ներկա էին Արցախի թեմի առաջնորդ Պարգև Արքեպիսկոպոս Մարտիրոսյանը, Ստեփանակերտի քաղաքապետ Սուրեն Գրիգորյանը, պետական այլ այրեր, հյուրեր և այլք:
