Ստեփանակերտի «Մենք ենք մեր սարերը» հուշարձանի մոտ քիչ առաջ դիմավորել են հունիսի 14-19-ը Ռումինիայում կայացած ավանդական կարատեի Եվրոպայի պատանիների առաջնությունում չեմպիոնի տիտղոսը նվաճած Վարդան Ղալայանին:
Ստեփանակերտում դիմավորել են Եվրոպայի չեմպիոնի տիտղոսը նվաճած Վարդան Ղալայանին
ՍՏԵՓԱՆԱԿԵՐՏ, 19 հունիսի, ԱՐՑԱԽՊՐԵՍ: Եվրոպայի չեմպիոնին ԱՀ կրթության, գիտության և սպորտի նախարարության աշխատակիցները, նրա հարազատները, ընկերները դիմավորել են աղ ու հացով, զուռնա դհոլով, ծափողջյուններով: ԱՀ կրթության, գիտության և սպորտի նախարարության ֆեդերացիաների բաժնի վարիչ Վալերի Հայրիյանն էլ Վ. Ղալայանին է հանձնել դափնեպսակ:
«Արցախպրես»-ի թղթակցի հետ զրույցում Վարդան Ղալայանն ասել է, որ առաջնությունում ինքն ունեցել է 4 մենամարտ: Մրցակցել է երկու ռումինացու, մեկ լեհի և եզրափակիչ փուլում մեկ չեխի հետ. վերջինիս նա հանդիպել է նաև անցած տարի:
Խոսելով առաջնության մասին՝ Վարդան Ղալայանն ասել է. «Դժվար էր մրցապայքարը, բայց արել եմ ամեն ինչ, որպեսզի հաղթանակ գրանցեմ: Ես արդեն հինգերոդ հաղթանակն եմ տոնում: Հաղթանակներիս գաղտնիքը կայանում է հետևողական, քրտնաջան պարապմունքների անցկացումը: Ես իմ հաղթանակը նվիրում եմ համայն հայության միասնությանը»:
Վ. Ղալայանը ավանդական կարատեով զբաղվում է 4 տարեկանից, իսկ պրոֆեսիոնալ կարատեով՝ 9 տարեկանից:
Վարդանի մարզիչ Միքայել Մխիթարյանն էլ մեզ հետ զրույցում իր գոհունակությունն է հայտնել մարզիկի ունեցած հաջողության համար:
Նա ասել է, որ Վարդանը բավականին աշխատասեր, հմուտ և փորձառու մարզիկ է, ով աշխարհի տարբեր երկրներում արդեն հինգ անգամ հաղթանակ է տոնել:
