«Թուֆենկյան» բարեգործական հիմնադրամի միջոցներով Քաշաթաղի շրջանի Կովսական համայնքում կառուցվել է նոր մարզադաշտ:
Կովսականում բացվել է ժամանակակից պահանջներին համապատասխան մարզադաշտ
ՍՏԵՓԱՆԱԿԵՐՏ, 21 հունիսի, ԱՐՑԱԽՊՐԵՍ: Մարզադաշտի բացման պատիվը տրվել է Ամերիկայի Միացյալ Նահանգներում ապրող Վիկտոր Զարուգյանին և նրա տիկնոջը՝ Ջուդի Սարյանին, որոնց անմիջական ֆինանսավորմամբ և Միացյալ Արաբական Էմիրություններում ապրող բարերար Արմիկ Խոսրոֆյանի օժանդակությամբ էլ կյանքի է կոչվել ծրագիրը:
«Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել Քաշաթաղի շրջվարչակազմի աշխատակազմի ղեկավար Դավիթ Դավթյանը:
Նա կարևորել և արժևորել է «Թուֆենկյան» բարեգործական հիմնադրամի կողմից մարզադաշտի բացումը՝ նշելով, որ այն պահանջված էր կովսականցիների համար:
Դ. Դավթյանը Քաշաթաղի շրջվարչակազմի ղեկավարի անունից շրջանի զարգացման ու կայացման հայրենանվեր գործում ունեցած զգալի ավանդի համար շնորհակալագիր է հանձնել բարերարներին:
Կովսականի քաղաքապետի տեղակալ Սուրեն Քարամյանն էլ ասել է, որ Կովսականում մինչ օրս չկար երիտասարդների համար զբաղմունքի որևէ վայր, որտեղ կկարողանան անցկացնել իրենց առօրյան: Այսօր ունեն ժամանակակից չափանիշներին համապատասխան մարզադաշտ, որտեղ էլ կմարզվեն երեխաները:
Խոսելով հիմնադրամի մասին՝ քաղաքապետի տեղակալն ասել է, որ հիմնադրամն իր ստեղծման օրվանից Կովսականում կատարել է բազում ներդրումներ: Հիմնադրամը բազմիցս ապացուցել է, որ իր գլխավոր նպատակն է շենացնել և հզորացնել հայրենիքը: Նրա հիմնական խնդիրներն են դարձել աջակցել խոցելի և մեկուսացած ընտանիքներին, նպաստել քաղաքացիական հասարակության վերականգնմանը, մշակութային և հոգևոր վերածննդին և օժանդակել ԱՀ սահմանամերձ շրջանների զարգացմանը:
Ս. Քարամյանը՝ Կովսականի բնակիչների անունից շնորհակալություն է հայտնել «Թուֆենկյան» բարեգործական հիմնադրամի ներկայացուցիչներին՝ ընդգծելով, որ իրենք մշտապես կանգնած են կովսականցիների թիկունքին:
Մեզ հետ զրույցում հիմնադրամի գործադիր տնօրեն Րաֆֆի Դուդակլյանն ասել է, որ մարզադաշտի կառուցումն իրականացվել է շուրջ 2 ամսվա ընթացքում: Մարզադաշտը կառուցվել է միջազգային չափանիշներին համապատասխան. այն նախատեսված է մինի ֆուտբոլի, բասկետբոլի և վոլեյբոլի համար:
«Նման ծրագրերի իրականացման հիմնական նպատակը ազատագրված համայնքների շենացումն է: Մենք Քաշաթաղի շրջանի տարբեր համայնքներում իրականացնում ենք մի շարք ծրագրեր: Առաջիկայում նախատեսում ենք տնտեսական, սոցիլական, վերակառուցման մի շարք այլ ծրագրեր ևս»,-ավելացրել է Ր. Դուդակլյանը:
Բարերար Վիկտոր Զարուգյանի խոսքով՝ ինքը շատ տպավորված է Կովսականով, և արդեն երկրորդ անգամն է այցելում այնտեղ:
«Ուրախ եմ, որ կարողացանք օգտակար լինել կովսականցիներին: Որպես Սփյուռքում ապրող հայ մեծ ոգևորություն է ինձ համար, երբ տեսնում եմ վերաբնակեցված տարածքների զարգացում: Մենք բարեգործական այլ ծրագրեր ևս շարունակում ենք իրականցնել Քաշաթաղի շրջանում»,-նշել է բարերարը:
Ըստ Ջ. Սարյանի՝ կառուցված մարզադաշտը լրիվությամբ համապատասխանում է իրենց պատկերացումների հետ: Նա հպարտ է, որ կարողացել է իր ամուսնու հետ ներդրում կատարել Արցախի շենացման ու զարգացման գործում:
Կովսականի երեխաներն էլ իրենց շնորհակալությունն են հայտնել բարերարներին, ովքեր ապրելով հայրենիքից հեռու, միշտ պատրաստ են աջակցել սահմանամերձ գյուղերի բնակիչներին:
