Թբիլիսիում անկարգությունների հետեւանքով մեկ մարդ մահացել է, հաղորդում է ՌԵՆ ՏՎ-ն:
Վրաստանում անկարգությունների հետեւանքով մեկ մարդ մահացել է. ԶԼՄ
ՍՏԵՓԱՆԱԿԵՐՏ, 22 հունիսի, ԱՐՑԱԽՊՐԵՍ: Հեռուստաալիքի տվյալներով՝ բողոքի ակցիաների մասնակիցը մահացել է հիվանդանոցում: Տեղեկությունը պաշտոնապես դեռ չի հաստատավել, փոխանցում է news.am-ը:
Վրաստանի մայրաքաղաքում բողոքի ակցիան վերսկսվել էր հունիսի 21-ին: Այն կրկին անցկացվել էր խորհրդարանի շենքի մոտ: Այս անգամ բողոքի մասնակիցները նույնպես բեմ եւ ձայնային սարքավորումներ էին տեղադրել: Ակցիային մասնակցող ուսանողները փակել էին խորհրդարան տանող Ռուսթավելի պողոտան:
Հինգշաբթի երեկոյան Թբիլիսիում տեղի է ունեցել լայնածավալ հակակառավարական ցույց, որը կազմակերպվել էր Վրաստանի խորհրդարանում ՌԴ Պետդումայի պատգամավոր Սերգեյ Գավրիլովի ելույթի հետեւանքով: Մասնակիցները պահանջում էին ներքին գործերի նախարարի, խորհրդարանի ղեկավարի եւ Ազգային անվտանգության ծառայության ղեկավարի հրաժարականը:
Իշխանությունները հրաժարվել էին իրականացնել այդ պահանջները, եւ կեսգիշերին մոտ հանրահավաքի մասնակիցները փորձել էին ներխուժել խորհրդարանի շենք:
Ոստիկանությունը ցրել էր հանրահավաքը՝ կիրառելով արցունքաբեր գազ, ռետինե փամփուշտներ եւ ջրցաններ: Բախումների հետեւանքով տուժել է 240 մարդ, այդ թվում՝ 80 ոստիկան: Տարբեր իրավախախտումների համար բերման են ենթարկվել 305 ցուցարարներ:
