ՍՏԵՓԱՆԱԿԵՐՏ, 4 հուլիսի, ԱՐՑԱԽՊՐԵՍ: «Արցախպրես»-ի թղթակցի հետ զրույցում թերթի գլխավոր խմբագիր Լիաննա  Պետրոսյանն  ասել է, որ  1934 թվականի  հուլիսի 4-ին, լույս է տեսել Ադրբեջանի ԿԿ Հադրութի շրջկոմի և շրջսովետի օրգան  «Կոլխոզնիկ» թերթը՝ 2 էջի վրա։

«Թերթի առաջին խմբագրի մասին որևէ արխիվային տեղեկություն չկա։ Հայտնի է, որ տարբեր տարիների թերթի խմբագրի պաշտոնում աշխատել են Եղիշե Համբարձումյանը, Գուրգեն Մելքումյանը, Սիմոն Միրզոյանը, Արտաշ Զախարովը, Հայկ Բալայանը։ Հայաստանի Ազգային Գրադարանում պահպանված փաստերի համաձայն՝ 1949թ թերթը տպագրվել է 2-4 էջ։ Մինչև 1955թ․ խմբագիրն էր Արշավիր Ավագյանը, նույն թվականից՝ Նորա Բաղդասարյանը։ 1959թ․ շրջանային թերթերը փակվել են և վերաբացվել 1965-ին։ 1979-1991թթ խմբագիրն էր Արփիկ Խասապետյանը, 1994-2008թթ՝ Յուրի Մադունցը, 2008-2014թթ՝ Վիտալի Պետրոսյանը:

1966թ․ մարտի 8-ին տպագրվել է Ադրբեջանի կոմունիստական կուսակցության Հադրութի շրջկոմի և աշխատավորների դեպուտատների շրջանային սովետի օրգան «ԿՈԼՏՆՏԵՍԱԿԱՆ» թերթը՝ 4 էջի վրա, որի խմբագիրն էր Էլմիր Լալայանը, ում 1969թ․ փոխարինել է Գրիգորի Մարդանյանը։ 1992-1994թ.թ. «ԴԻԶԱԿ»-ը չի հրատարակվել՝ էլեկտրաէներգիայի բացակայության, թշնամու հրետակոծությունների արդյունքում տպարանի՝ շարքից դուրս գալու և այլ պատճառներով։

1994թ-ի հոկտեմբերի 13-ին լույս է տեսել ժողովրդական պատգամավորների Հադրութի շրջանային խորհրդի օրգան «ԴԻԶԱԿ» թերթի առաջին համարը՝ 2 էջի վրա, 1995թ-ի մարտի 24-ից՝ Հադրութի շրջանի վարչակազմի օրգան՝ 2 էջի վրա, իսկ 1996թ․ օգոստոսի 26-ից առ այսօր տպագրվում է որպես Հադրութի շրջանի վարչակազմի պաշտոնաթերթ՝ հիմնականում 4 էջի վրա»,-մասնավորապես  ասել   է  Լ.  Պետրոսյանը՝   ընդգծելով, որ  1998թ․ հոկտեմբերին Արփի Վանյանի ջանքերով լույս է ընծայվել համակարգչային շարվածքով «ԴԻԶԱԿ» թերթը։

Նրա  խոսքով՝ «ԿՈԼԽՈԶՆԻԿ» թերթը տպագրվել է 800-900 տպաքանակով, Հադրութի տպարանում, «ԿՈԼՏՆՏԵՍԱԿԱՆ»-ի տպաքանակը՝ 2400, տպագրվում էր Ստեփանակերտի Լենինի անվան տպարանի Հադրութի բաժանմունքում: «ԴԻԶԱԿ»-ը տպագրվել է Ստեփանակերտի Լենինի անվան տպարանի Հադրութի բաժանմունքում, 1994-ից՝ Վ․ Ամիրջանյանի անվան Հադրութի տպարանում, «Պոլիգրաֆ» ՊՓԲԸ տպարանում, «ՍՈՆԱ» ՓԲԸ հրատարակչությունում և «ԴԻԶԱԿ ՊԼՅՈՒՍ» ՍՊԸ-ում՝ առ այսօր՝ 4 էջի վրա՝ 400 օրինակով։

Ըստ  Լ.  Պետրոսյանի՝  ժամանակի հետ բովանդակային փոփոխության են ենթարկվել նաև թերթում տպագրվող նյութերը։

«Հադրութի շրջվարչակազմի «ԴԻԶԱԿ» պաշտոնաթերթն  այսօր  էլ   շարունակում է իր բնականոն գործունեությունը՝ ԱՀ ներքին և արտաքին քաղաքականության սկզբունքներին համապատասխան լուսաբանելով ինչպես շրջանային, այնպես և հանրապետական մասշտաբով տեղի ունեցաղ իրադարձությունները, տեղեկատվական ծառայություն մատուցելով շրջանի բնակչությանը, տպագրելով ընթերցողների ստեղծագործությունները։ Թերթը տպագրվում է որպես երկշաբաթաթերթ՝  էջերի քանակը՝ 4, տպաքանակը՝ 400։  Թերթի համարներում լուսաբանվում են պետական և ազգային տոները, համայնքների ղեկավարների հաշվետվությունները, շրջվարչակազմի խորհրդի նիստերի համառոտ արձանագրությունները, գյուղատնտեսության, մշակույթի, կրթական և այլ ոլորտների առնչվող հարցեր։ Առանձին հոդվածներով անդրադարձ է կատարվում զոհված, անհայտ կորած և հաշմանդամ ազատամարտիկներին, դիրքապահ զինվորներին։ Պարբերաբար ներկայացվում է Հադրութի շրջանի հասարակական-քաղաքական, սոցիալ-տնտեսական, մարզա-մշակութային կյանքը, վեր են հանվում նաև սոցիալական խնդիրներ»,-ավելացրել  է   թերթի  խմբագիրը։

«Արցախպրես» լրատվական գործակալությունը շնորհավորում է թերթի խմբագրակազմին՝ մաղթելով   նորանոր ձեռքբերումներ  և   անխոնջ  աշխատանք: