Մեր երկրի կարևորագույն խնդիրներից մեկն այն է, որ բոլոր քաղաքական ուժերը, մասնավորապես՝ նրանց առաջնորդները, քաղաքական գործունեության մեջ պահպանեն օրենքի գերակայությունը և առաջնորդվեն Սահմանադրությամբ:
Քաղաքական անցնցում պրոցեսների կազմակերպումը մեր հանրապետությունում այլընտրանք չունի. Դավիթ Բաբայան
ՍՏԵՓԱՆԱԿԵՐՏ, 11 հուլիսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Արցախի Պահպանողական կուսակցության նախագահ Դավիթ Բաբայանը և ընդգծել, որ այս հանգամանքը վերաբերում է ցանկացած քաղաքական գործչի և քաղաքական ուժի՝ անկախ նրանից, թե երբ են հիմնադրվել և ինչ գաղափարներ են կրում:
«Քաղաքական անցնցում պրոցեսների կազմակերպումը մեր հանրապետությունում այլընտրանք չունի, և ստեղծված իրավիճակում ելքը մեկն է՝ 2020 թվականին կազմակերպել և անցկացնել բաց, թափանցիկ համաժողովրդական ընտրություններ՝ ձևավորելով քաղաքական նոր իշխանություն: Մեր բնակիչներին կհորդորեի ուշադիր ուսումնասիրել բոլոր քաղաքական ուժերին և թեկնածուներին, որպեսզի ըստ այդմ կատարեն իրենց ընտրությունը. Արցախը փոքր երկիր է, և բոլորը համարյա թե իրար ճանաչում են: Այդ համատեքստում շատ հեշտ է իմանալ՝ ով ով է: Դժվար չէ տեսնել՝ համապատասխանում է այս կամ այն քաղաքական գործչի հնչեցրած գաղափարները և նրա իրական ապրելակերպը»,- նշել է Դ. Բաբայանը:
