Այսօր՝ հուլիսի 13-ին, Ստեփանակերտում կայացել է Արցախի Հանրապետության «Անհայտ կորած ազատամարտիկների հարազատների միություն» հասարակական կազմակերպության 7-րդ համագումարը:
Կայացել է ԱՀ անհայտ կորած ազատամարտիկների հարազատների միության 7-րդ համագումարը
ՍՏԵՓԱՆԱԿԵՐՏ, 13 հուլիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել «Անհայտ կորած ազատամարտիկների հարազատների միություն» ՀԿ նախագահ Վերա Գրիգորյանը: Նա շնորհակալություն է հայտնել բոլոր նրանց, ովքեր տարիների ընթացքում եղել են իրենց կողքին և ցուցաբերել են թե´ նյութական և թե´ բարոյական օգնություն:
«Կազմակերպությունն իր գոյության 25 տարիների ընթացքում հաղթահարելով բազում դժվարություններ ձեռք է բերել որոշակի հաջողություններ: Միությունում հաշվառված են 773 անհայտ կորածներ, որից 250-ն ազատամարտիկներ են: Կազմակերպության անդամների թիվն ավելի քան 3200 է: Մեր միությունը սերտորեն համագործակցել ու համագործակցում է տարբեր միությունների, հասարակական կազմակերպությունների, կառավարության տարբեր օղակների, ինչպես նաև բարերարների հետ, որոնց օժանդակությամբ էլ միջոցներ է հայթհայթել անհայտ կորած ազատամարտիկների ընտանիքներին աջակցելու համար:Մենք կապված ենք հայոց բանակի հետ և պարբերաբար լինում ենք զորամասերում, հանդես գալիս տարբեր միջոցառումներով:Այցելում ենք նաև անհայտ կորած ազատամարտիկների անապահով ընտանիքներին և հնարավորին չափ նյութական օգնություն ցուցաբերում: Սակայն վերջին շրջանում մեր միությունը հայտնվել է խիստ սուղ ֆինանսական վիճակում, ինչն անկատար է թողել մեր որոշ նախատեսումներ:Մենք մինչև այժմ ուժ ու եռանդ չենք խնայել լուծելու մեր առջև դրված խնդիրները: Մեր կազմակերպության անվանն ու կանոնադրությանը համապատասխան սատարում ենք միմյանց՝ հուսալով, որ գուցե մի հրաշալի օր տղաները կվերադառնան տուն, և մենք նրանց կդիմավորենք հագիստ խղճով ու պարզ ճակատով»,- մասնավորապես ասել է նա:
Համագումարի նախագահ, «Աֆղանստանի պատերազմի վետերանների միություն» ՀԿ աշխատակազմի ղեկավար Արմեն Գևորգյանն էլ իր ելույթում ներկայացրել է համագումարի օրակարգը: Նա նաև նշել է, որ իրենց կազմակերպությունն երկար տարիներ համագործակցել է «Անհայտ կորած ազատամարտիկների հարազատների միություն» ՀԿ-ի հետ, որի արդյունքում իրականացվել ու շարունակվելու են իրականացվել մի շարք կարևոր աշխատանքներ:
Համագումարին ներկա Ստեփանակերտի N12 դպրոցի տնօրեն Էլմիրա Գաբրիելյանն էլ իր խոսքում մասնավորապես ասել է, որ ինքը հպարտանում է իր երկրի ձեռքբերումներով և այսօրվա սերնդով, ովքեր ամեն վայրկյան պատրաստակամ են սրբորեն պահելու անշիրիմ ու անհայտ ճակատագրի տեր քաջ տղաների արյամբ սրբացած հողերի ամեն մի թիզը:
««Որոշում»քաղաքացիական նախաձեռնություն» ՀԿ նախագահ Արթուր Հայրապետյանն էլ իր ելույթում մասնավորապես նշել է, որ «Անհայտ կորած ազատամարտիկների հարազատների միություն» ՀԿ-ի կատարած աշխատանքներն անգնահատելի են և բոլորն էլ բարոյապես պարտավոր են ինչ-որ կերպ սատարել դրանց: Նա հերոսածին մայրերին մաղթել է ուժ և աստվածային հավատ:
Համագումարի ընթացքում ընտրվել են վարչության անդամների և վերստուգիչ հանձնաժողովի նոր կազմերը:Քվեարկության արդյունքում Վերա Գրիգորյանը կրկին դաձել է «Անհայտ կորած ազատամարտիկների հարազատների միություն» ՀԿ-ի նախագահ:
Համագումարի վերջում Վերա Գրիգորյանը մի խումբ անձանց պարգևատրել է մեդալներով և պատվոգրերով՝ «Անհայտ կորած ազատամարտիկների հարազատների միություն» ՀԿ-ի հետ ակտիվ համագործակցության, ջերմ ուշադրության և աջակցության համար:
