Հայաստանյան փորձը վկայում է այն մասին, որ ոչ միայն կարևոր է կատարյալ ընտրական օրենսգիրք ունենալը, այլ նաև ընտրական գործընթացներն այնպիսի եղանակով կազմակերպելը, որը վստահություն կներշնչի հասարակությանը՝ իր ընտրությունը կատարելու հարցում:
Փոխօգնության միջոցով փորձելու ենք խուսափել ընտրական գործընթացները ստվերող երևույթներից. Վլադիմիր Վարդանյան
ՍՏԵՓԱՆԱԿԵՐՏ, 14 հուլիսի, ԱՐՑԱԽՊՐԵՍ: Այս մասին այսօր՝ հուլիսի 14-ին, Արցախի Հանրապետության Ազգային ժողովում կայացած ԱՀ ԱԺ և ՀՀ ԱԺ պետական-իրավական հարցերի մշտական հանձնաժողովների համատեղ նիստից հետո հանձնաժողովների նախագահների և լրագրողների հետ կայացած ճեպազրույցի ժամանակ ասել է ՀՀ ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանը:
Նա նշել է, որ ինքը չափազանց կարևոր է համարում մասնագիտական միջհանձնաժողովային քննարկումները, երբ գործ ունեն իրավական գործընթացի հետ: «Ընտրական օրենսգրքի ընդունումը կարևորագույն գրավականներից մեկն է Արցախում ժողովրդավարության ամրապնդման գործում: Համատեղ նիստի ընթացքում քննարկել ենք ընտրական օրենսգրքի հայեցակարգային և տեխնիկական հիմնահարցերին առնչվող մի շարք խնդիրներ: Քննարկման երկու ձևաչափ էինք ընտրել՝ բաց՝ լրագրողների և հանրության մասնակցությամբ, որի շրջանակներում անդրադարձել ենք այն հիմնական հարցերին, որոնք հետաքրքրություն էին ներկայացնում հանձնաժոողովների տեսանկյաունից, այնուհետև փակ՝ տեխնիկական բոլոր տեսակի հարցերը քննարկելու համար: Բարձր եմ գնահատում ծավալված քննարկումը, որը չի ավարտվում նիստով, և մենք նախատեսում ենք շատ արագ արձագանքել ու մեր մոտեցումները ներկայացնել ԱՀ Ազգային ժողով՝ ընտրական օրենսգրքի առաջինից երկրորդ ընթերցման միջև ընկած ժամանակահատվածում: Մենք որևիցե եղանակով չենք փորձելու միջամտնել ԱՀ ներքին գործերին, պարզապես մեր փորձագիտական կարծիքն ենք ներկայացնելու պետաիրավական հարցերի հանձնաժողովներին և փորձելու ենք շտկել այն բոլոր թերություններն ու բացթողումները, որոնք առակա են ընտրական օրենսգրքում: Ընտրական օրենսգրքի փոփոխությունը միակ գրավականը չէ նորմալ ընտրություններ կազմակերպելու համար, և անհրաժեշտ է նաև անդրադառնալ այլ իրավական ակտերի, որոնք կարող են իրենց նպաստը բերել ընտրական գործընթացի կազմակերպման և բարեհաջող անցկացման համար: Շատ կարևոր է, որ Հայաստանն ու Արցախը փոխադարձ օգնության միջոցով խուսափեն ընտրական գործընթացին առնչվող այն բոլոր խոչընդոտներից, որոնք կարող են ստվերել ընտրական գործընթացները: Նախատեսում ենք մեր հանդիպումներն անցկացնել պարբերականության սկզբունքով և մեր հաջորդ համատեղ միջհանձնաժողովային նիստը կայացնել Երևանում»,-մասնավորապես ասել է Վ. Վարդանյանը: