Մարտունի քաղաքում պետական պատվերով շարունակվում է բազմաբնակարան թաղամասի շինարարության երկրորդ փուլը:
Մարտունու բազմաբնակարան նոր թաղամասը սեպտեմբերին շահագործման կհանձնվի
ՍՏԵՓԱՆԱԿԵՐՏ, 17 հուլիսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է շինարարական աշխատանքներն իրականացնող «Ֆերզիտ» ընկերության տնօրեն Արթուր Խաչատրյանը և ավելացրել, որ ևս 92 բնակարան կտրամադրվի սոցիալական տարբեր խմբերի և հիպոթեքային մատչելի պայմաններով՝ երիտասարդ ընտանիքներին:
«Մարտունիում նոր բազմաբնակարան թաղամասի առաջին փուլի շինարարական աշխատանքները մեկնարկել էր 2014 թ.-ի փետրվարի 14-ին: Ներկայումս ծրագիրը գտնվում է ավարտման փուլում: Իրականացվում են բարեկարգման և ներքին հարդարման աշխատանքներ, որոնք կարճ ժամանակահատվածում կհասցվեն ավարտին»,- նշել է Ա. Խաչատրյանը:
«Ֆերզիտ» ընկերության տնօրենը վստահեցրել է, որ շենքերը կառուցվել են ֆրանսիական արդի նախագծային ոճով, կատարվել են որոշակի նորամուծություններ: Օրինակ` բնակարաններում խոհանոցի հատվածը միացվել է ընդհանուր հյուրասենյակին, իսկ դրսի հատվածում բացակայում են պատշգամբները:
Ընդհանուր առմամբ, թաղամասում նախատեսված է 8 հասարակական նշանակության օբյեկտ, խաղահրապարակ: Նկուղային հատվածում կառուցվող ռմբապաստարանները մարզասեր բնակիչների համար կծառայեն որպես մարզադահլիճ:
Ա. Խաչատրյանը նշել է, որ նախատեսվում է ընթացիկ տարվա սեպտեմբերի 2-ի տոնական օրը շենքերը հանձնել շահագործման: Նորակառույց բազմաբնակարան թաղամասի առաջին հատվածում արդեն իսկ բնակեցված է 91 բնակարան:
