ԱՀ գրողների միության նախաձեռնությամբ և ԱՀ մշակույթի, երիտասարդության հարցերի և զբոսաշրջության նախարարության աջակցությամբ Ստեփանակերտի մշակույթի և երիտասարդության պալատում այսօր կազմակերպվել է գրող, հրապարակախոս Մաքսիմ Հովհաննիսյանի ծննդյան 85-ամյակին նվիրված հոբելյանական երեկո:
Ստեփանակերտում կազմակերպվել է Մաքսիմ Հովհաննիսյանի ծննդյան 85-ամյակին նվիրված հոբելյանական երեկո
ՍՏԵՓԱՆԱԿԵՐՏ, 17 հուլիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանը:
Նրա բնութագրմամբ՝ Մաքսիմ Հովհաննիսյանն արցախյան ռահվիրաներից մեկն է, ով Արցախի գյուղագրությունը հասցրել է մի նոր որակական աստիճանի:
«Հոբելյարի գրվածքներն ընթերցվում է մեկ շնչով՝ սկսած նրա հրապարակախոսական գործերից մինչև ամենալուրջ աշխատանքները: Մ. Հովհաննիսյանն ուրույն դերակատարություն ունի լրագրության ոլորտում: Ամենադժվարին ժամանակաշրջանում ղեկավարելով Արցախի հանրապետական թերթը՝ նա կարողացել է Արցախյան ազատագրական պայքարը յուրովի մեկնաբանել մամուլի էջերում»,-մասնավորապես ասել է Լ. Հովհաննիսյանը:
ԱՀ Ազգային ժողովի նախագահ Աշոտ Ղուլյանի խոսքով՝ իր համար մեծ պատիվ է շնորհավորական
խոսք հղել Արցախում ճանաչված, սիրված և իր գործունեությամբ համազգային գործչի տիտղոսին արժանացած Մ. Հովհաննիսյանի հոբելյանական երեկոյին:
«Մ. Հովհաննիսյանն իր բոլոր արժանիքներով հանդերձ նաև կենդանի կամուրջ է 1965 թվականի Արցախի ազատության համար առաջին հավաքական պահանջի, 1988 թվականի համաժողովրդական շարժման պահանջատիրության և անկախ պետություն կերտելու աննահանջ ճանապարհի բոլոր կետերի միջև»,-մասնավորապես ասել է Ա. Ղուլյանը:
Միջոցառմանը ներկա ՀՀ գրողների միության նախագահ Էդվարդ Միլիտոնյանն էլ ասել է, որ Մ. Հովհաննիսյանն իր ստեղծագործություններում ներկայացրել է Արցախի պատմությունը:
Նա արժևորել և կարևորել է Մ. Հովհաննիսյանի դերն Արցախի հասարակական, քաղաքական, լրատվական, գրական ոլորտներում՝ ընդգծելով, որ նրա յուրաքանչյուր տողն իրական կյանքի արտացոլանք է:
Է. Միլիտոնյանը ՀՀ գրողների միության անդամների անունից շնորհավորել է Մ. Հովհաննիսյանին և նրան հանձնել «Գրական վաստակի համար» մեդալ:
Ըստ ԱՀ կրթության, գիտության և սպորտի նախարար Նարինե Աղաբալյանի՝ Մ. Հովհաննիսյանն իր ապրած կյանքով, ստեղծած ժառանգությամբ, ավանդով և իմաստնությամբ դարձել է Արցախի նահապետը:
Նա դիմելով հոբելյարին ասել է.«Ձեր անցած հետագիծը լավագույնս բնութագրում է հայրենիքի ազատության, արցախցու ինքնության և արդարության համար պայքարը, կռիվը, ներքին խռովքը, որ ժամանակ առ ժամանակ վերածվում է ըմբոստության և ապա մտքի մեջ խտանալով ժայթքում՝ ծնունդ տալով նոր երկերի ու տողերի: Արցախի հանդեպ սիրուց է ծնվել ցավը, անհանգստությունը, հպարտությունը, որ կա և ապրում է Ձեր ստեղծագործություններում: Քանի-քանի սերունդ դեռ Ձեր տողերի մեջ կգտնի և կճանաչի ինքն իրեն: Շատերին էլ Ձեր խոսքը կստիպի ինքնամաքրվել և վերադառնալ հարազատ ակունքներին: Ձեր գրչակից ընկերները շնորհակալ են Ձեզ, որ տեր եք կանգնել իրենց անտիպ տողերին: Շնորհակալ եմ ես, որ հնարավորություն եք տվել ինձ մասնակիցը դառնալու «Արցախապատում»-ի Ձեր նախաձեռնության իրականացմանը: Ձեր գրիչը բեղուն է, Ձեր բառը կշիռ ունի, Ձեր խոսքն արժեքավոր է և միշտ պահանջված»:
Հոբելյանական երեկոյին ելույթներով հանդես են եկել նաև ԱՀ գրողների միության անդամներ, գործընկերներ, ովքեր նաև խորհրդանշական նվերներ են հանձնել Մ. Հովհաննիսյանին:
Միջոցառման վերջում Մաքսիմ Հովհաննիսյանն իր խորին շնորհակալությունն է հայտնել երեկոյի կազմակերպիչներին, մասնակիցներին, ինչպես նաև այն անձանց, ովքեր գնահատանքի և գովսետի խոսքեր են հղել իր հասցեին:
Միջոցառմանը ներկա էր ԱՀ նախագահ Բակո Սահակյանը, Արցախի թեմի առաջնորդ Պարգև արքեպիսկոպոս Մարտիրոսյանը, պետական այրեր, հյուրեր, հոբելյարի հարազատներ և այլք:
