ԱՀ նախագահի հետ քննարկել ենք մեր երկու գործընկեր կառույցների համագործակցությանը վերաբերող մի շարք հարցեր:
Արդյունավետ եմ համարում տարիների կատարած համատեղ աշխատանքները. ՀՀ հանրային ծառայությունները կարգավորող հանձնաժողովի ղեկավար
ՍՏԵՓԱՆԱԿԵՐՏ, 19 հուլիսի, ԱՐՑԱԽՊՐԵՍ: Նախագահի հետ հանդիպումից հետո այս մասին «Արցախպրես»-ի թղթակցի հետ զրույցում ասել է Հայաստանի Հանրապետության հանրային ծառայությունները կարգավորող հանձնաժողովի ղեկավար Գարեգին Բաղրամյանը:
Նրա խոսքով՝ արդեն 12 տարի է, ինչ իրենք համագործակցում են Արցախի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովի հետ:
«Ամեն տարի մենք կազմակերպում ենք փոխայցելություններ: Պայմանավորված նրանով, որ ՀՀ հանրային ծառայությունները կարգավորող հանձնաժողովի կազմն ամբողջությամբ փոխվել է, մենք պատեհ համարեցինք կրկին լինել Արցախում և ծանոթանալ մեր գործընկեր կառույցի անդամների հետ: Առավել ակտուալ հարցերը, որ այսօր քննարկեցինք՝ կապված են ռոմինգի, էլեկտրաէներգետիկական համակարգի օպերատորի, ինչպես նաև սպառողներին վաճառվող էլեկտրաէներգիայի սակագների հարցերին»,-ավելացրել է Գ. Բաղրամյանը:
Անդրադառնալով համագործակցությանը՝ մեր զրուցակիցն ասել է, որ ինքն արդյունավետ է համարում տարիների կատարած համատեղ աշխատանքները: Նա կարևորել է կառույցների ներկայացուցիչների փոխադարձ այցելությունները, համագործակցության շրջանակներում քննարկվող հարցերը, ինչպես նաև վերապատրաստումները:
