Աֆղանստանի մայրաքաղաք Քաբուլի համալսարանի դարպասների մոտ ռումբ է պայթել, ինչի հետևանքով 6 մարդ է զոհվել, ևս 27-ը տուժել են:
Քաբուլի համալսարանի մոտ ռումբ է պայթել, կան զոհեր և վիրավորներ
ՍՏԵՓԱՆԱԿԵՐՏ, 19 հուլիսի, ԱՐՑԱԽՊՐԵՍ: Tert.am-ի փոխանցմամբ, գրում Reuters գործակալությունը:
Պայթյունը տեղի է ունեցել վաղ առավոտյան: Հայտնի չէ՝ արդյոք այն իրականացվել է մահապարտի կողմից, թե հեռակառավարվող մեխանիզմի միջոցով:
Համալսարանի տարածքում մի քանի հոսթել է գործում, որտեղ շատ ուսանողներ են բնակվում ամռան ընթացքում: Պայթյունի պահին համալսարանում մի խումբ իրավաբաններ դատավոր դառնալու համար քննություն հանձնելիս են եղել: Հայտնի չէ՝ արդյոք նրանք են եղել պայթյունի թիրախը:
Ներկա պահին պայթյունի համար դեռ ոչ մի խմբավորում պատասխանատվություն չի ստանձնել, սակայն հայտնի է, որ քաղաքում ահաբեկչական պայթյունների հիմնական հեղինակները «Թալիբան» և «Իսլամական պետություն» խմբավորումներն են, որոնք թիրախավորում են Աֆղանստանի ուժային կառույցներին, կառավարության պաշտոնյաներին և իսլամի շիա ուղղության ներկայացուցիչ փոքրամասնություններին:
