Պարի և սպորտային պարերի համահայկական խորհրդի և ԱՀ պարի և սպորտային պարերի միության համատեղ նախաձեռնությամբ, Արցախի Հանրապետության կրթության, գիտության և սպորտի նախարարության և մի շարք մասնավոր ընկերությունների աջակցությամբ Ստեփանակերտի «Վալլեքս Գարդեն» հյուրանոցային համալիրում հուլիսի 19-ին մեկնարկել է «Պար առանց սահմանների» սպորտային-պարահանդեսային պարերի միջազգային մրցույթ-փառատոնը:
Ստեփանակերտում մեկնարկել է «Պար առանց սահմանների» միջազգային մրցույթ-փառատոնը
ՍՏԵՓԱՆԱԿԵՐՏ, 20 հուլիսի, ԱՐՑԱԽՊՐԵՍ: «Արցախպրես»-ի թղթակցի հետ զրույցում պարի և սպորտային պարերի համահայկական խորհրդի նախագահ, միջազգային կարգի մրցավար Մարիաննա Մամյանն ասել է, որ Պարի և սպորտային պարերի համահայկական խորհուրդը (ՊՍՊՀԽ) հիմնադրվել է 2003 թվականին և ստեղծման օրվանից սերտորեն համագործակցում է Պարի համաշխարհային խորհրդի հետ:
«Երեք տարի առաջ ստեղծել ենք ԱՀ պարի և սպորտային պարերի միությունը, քանի որ Արցախում պարի հասարակական կազմակերպություն, միություն չկար: Դիվանագիտական առումով նույնպես միության ստեղծումը շատ ճիշտ քայլ էր, որովհետև կան հարցեր, որ պետք է լուծել այս ճանապարհով: Հույս ունենք, որ մի օր էլ աշխարհի առաջնությունը կկազմակերպվի Արցախում՝ ոչ թե չճանաչված, այլ ճանաչված պետությունների մասնակցությամբ:Մենք պետք է աշխարհին ճանաչելի դարձնենք Արցախը և ցույց տանք, որ այստեղ մարդիկ ապրում են բնականոն կյանքով և կարողանում են կազմակերպել միջազգային չափանիշներին համապատասխան միջոցառումներ:Փառատոնին Արցախից, Հայաստանից և Ռուսաստանի Դաշնությունից մասնակցում են մոտ 300 հոգի: Մասնակիցները ներկայացնելու են տարբեր ոճի պարաձևեր:Մրցանակային տեղեր զբաղեցնողները պարգևատրվելու են պատվոգրերով, մեդալներով և գավաթներով»,-մասնավորապես ասել է նա: