Այս տարվա օգոստոսին Թուրքիան ահաբեկիչների նկատմամբ ևս մի հաղթանակ կտանի:
«Այս տարվա օգոստոսին Թուրքիան ահաբեկիչների նկատմամբ ևս մի հաղթանակ կտանի». Էրդողան
ՍՏԵՓԱՆԱԿԵՐՏ, 10 օգոստոսի, ԱՐՑԱԽՊՐԵՍ: Tert.am-ի փոխանցմամբ, այս մասին հայտնում են թուրքական լրատվամիջոցները, հայտարարել է Թուրքիայի նախագահ Ռեջեփ Թայիփ Էրդողանը՝ մուսուլմանական Կուրբան Բայրամ (զոհաբերության տոն, որով ավարտվում է հաջը) տոնի հետ կապված բնակչությանն արված ուղերձի ժամանակ:
Թուրքիայի նախագահը նշել է, թե «Թուրքիայի պատմությունը լի է հաղթանակներով»:
Նա ընդգծել է, որ Թուրքիան ակտիվ պայքար է մղում ահաբեկչության դեմ:
«Այս պայքարը կտարվի մինչև վերջին ահաբեկչի ոչնչացումը»,- ասել է նա:
Օրեր առաջ Թուրքիայի նախագահը հայտարարել էր Սիրիայում «ահաբեկչության դեմ պայքարի նոր փուլի»մեկնարկի մասին: Մասնավորապես՝ նա ասել էր, որ Թուրքիան շուտով Սիրիայում ահաբեկչության դեմ պայքարի նոր փուլ կսկսի, որը սկիզբ է առել «Եփրատի վահան» և «Ձիթենու ճյուղ» գործողություններից:
Իսկ մինչ այդ հայտարարել էր, որ Թուրքիան ռազմական գործողություն կսկսի Սիրիայի հյուսիսում Եփրատից արևելք գտնվող քրդերի ինքնապաշտպանական ուժերի դեմ և այդ մասին արդեն իրազեկել է Ռուսաստանին և Միացյալ Նահանգներին: Աղբյուրի տեղեկություններով՝ Թուրքիան նման գործողություն կարող է սկսել օգոստոսի 11-ից հետո:
«Մեր գլխավոր խնդիրը Սիրիայի հյուսիսն ահաբեկիչներից մաքրելն է: Մենք ԱՄՆ-ից և ՆԱՏՕ-ից մեր գործընկերային հարաբերություններին համապատասխան քայլերի ենք սպասում: Սիրիայում ահաբեկչության դեմ մեր պայքարը, որը սկսվել է «Եփրատի վահան» և «Ձիթենու ճյուղ» գործողությունների շրջանակում, շուտով նոր փուլի կանցնի»,- Ակարայում թուրք դեսպանների հետ հանդիպման ժամանակ հայտարարել էր Էրդողանը:
Նրա խոսքով՝ Թուրքիան իրեն անվտանգ չի զգա այնքան ժամանակ, քանի դեռ իր հարավային սահմանների մոտ «ահաբեկչական խմբավորում» է գտնվում:
«Այդ գոտին աճում է քաղցկեղի պես և ամրապնդվում է Անկարայի դաշնակիցների կողմից զենքի մատակարարումների շնորհիվ»,- հավելել էր Էրդողանը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարինուղարկելով sms հաղորդագրություն՝ նշելով համապատասխան կոդը` -34-:
