Բրազիլիայի իշխանություններն արգելել են Վենեսուելայի կառավարության բարձրաստիճան պաշտոնյաների մուտքը երկրի տարածք:
Բրազիլիան արգելել է վենեսուելացի բարձրաստիճան պաշտոնյաների մուտքը երկրի տարածք
ՍՏԵՓԱՆԱԿԵՐՏ, 21 օգոստոսի, ԱՐՑԱԽՊՐԵՍ: Այս մասին ասվում է կառավարության պաշտոնական ամսագրում հրապարակված որոշման մեջ:
«Սույնով ուժի մեջ է մտնում օրենքը, որն արգելում է վենեսուելական վարչակարգի բարձրաստիճան պաշտոնյաների մուտքը Բրազիլիայի տարածք, որոնք իրենց գործողություններով հակասում են մեր երկրի դաշնային սահմանադրության սկզբունքներին և նպատակներին՝ խախտելով ժողովրդավարությունը, մարդու արժանապատվությունն ու մարդու իրավունքները»,- tert.am-ի փոխանցմամբ՝ ասված է որոշման մեջ:
Նշվում է, որ Բրազիլիայի ներքին գործերի նախարարությունը ցուցակ է պատրաստում, որում կներառվեն Բրազիլիա մուտք գործելու իրավունք չունեցող մարդկանց անունները: Ցուցակն այնուհետև կուղարկվի Արդարադատության և հանրային անվտանգության նախարարություն: Նշվում է նաև, որ երկրի ՆԳՆ-ն կարող է հետագայում թարմացնել ցուցակը:
Հիշեցնենք, որ այս տարվա հունվարին Վենեսուելայում բողոքի զանգվածային ցույցեր էին սկսվել երկրի նախաագհ Նիկոլաս Մադուրոյի և նրա վարչակազմի պաշտոնավարման դեմ: Ցույցերի ֆոնին երկրի Ազգային ժողովի խոսնակ Խուան Գուաիդոն իրեն ապօրինաբար երկրի նախագահ էր հռչակել և աջակցում էր ցուցարարներին: Արևմուտքի մի շարք երկրներ՝ ԱՄՆ-ի գլխավորությամբ, ճանաչել էին նրա իշխանությունը, մինչդեռ Ռուսաստանը, Չինաստանը, Թուրքիան և մի շարք այլ երկրներ աջակցում էին Մադուրոյին՝ որպես լատինամերիկյան երկրի օրինական ղեկավարի:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -12-:
