Չինաստանը սեպտեմբերի 1-ից և դեկտեմբերի 15-ից ԱՄՆ-ից ներկրվող արտադրանքի համար կբարձրացնի մաքսատուրքերը 10 և 5 տոկոսով՝ ընդհանուր 75 մլրդ դոլարի չափով:
Չինաստանը 75 մլրդ դոլարով կբարձրացնի ԱՄՆ-ից ներկրվող ապրանքների մաքսատուրքերը
ՍՏԵՓԱՆԱԿԵՐՏ, 24 օգոստոսի, ԱՐՑԱԽՊՐԵՍ: Այս մասին հայտնում է Tert.am-ը ՉԺՀ-ի պետական խորհրդին առընթեր սակագների և տուրքերի կոմիտեի հաղորդագրությանը հղումով:
«Սակագների և տուրքերի կոմիտեն որոշում է ընդունել 75 մլրդ դոլար ընդհանուր ծավալով ԱՄՆ-ից 5078 ապրանքների համար ներմուծման մաքսատուրքերը բարձրացնել 10 և 5 տոկոսներով»,- ասված է հաղորդագրության մեջ:
Աղբյուրի հաղորդմամբ՝ միջոցները ձեռնարկվել են՝ ի պատասխան ԱՄՆ-ի պրոտեկցիոնիզմին:
«Միացյալ Նահանգների նման գործողությունները հանգեցրել են չին-ամերիկյան առևտրային շփման հետագա էսկալացիայի և հսկայական վնաս են հասցրել ՉԺՀ-ի, ԱՄՆ-ի և այլ պետությունների շահերին: Նրանք նաև լուրջ սպառնալիք են ստեղծել բազմակողմ առևտրային համակարգի և ազատ առևտրի սկզբունքների համար»,- ասված է հաղորդագրության մեջ:
Ավելի վաղ ԱՄՆ նախագահ Դոնալդ Թրամփը հայտնել էր, որ սեպտեմբերի 1-ից Վաշինգթոնը 300 մլրդ դոլար արժողությամբ ապրանքների համար 10 տոկոսի չափով նոր մաքսատուրքեր կսահմանի:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -11-:
