Այսօր լրանում է Աշոտ Ղուլյանի (Բեկոր) մահվան 27-րդ տարելիցը
Այսօր՝ օգոստոսի 24-ին, Ստեփանակերտի Աշոտ Ղուլյանի (Բեկոր) հուշաքարի մոտ տեղի է ունեցել հերոսի՝ Արցախյան ազատամարտի մասնակից, ՀՅԴ անդամ, ԼՂՀ Ստեփանակերտի առաջին վաշտի հրամանատար, «Արցախի հերոս», «Մարտական խաչ» առաջին աստիճանի շքանշանակիրի մահվան 27-րդ տարելիցին նվիրված միջոցառում:
Այսօր լրանում է Աշոտ Ղուլյանի (Բեկոր) մահվան 27-րդ տարելիցը
ՍՏԵՓԱՆԱԿԵՐՏ, 24 օգոստոսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ԱՀ Ազգային ժողովի նախագահ Աշոտ Ղուլյանը, պետական այրեր, Բեկորի զինակից ընկերն ու հարազատները, ՀՅԴ ներկայացուցիչները, ԱՀ բռնցքամարտի ֆեդերացիայի անդամները ծաղիկներ և ծաղկեպսակ են խոնարհել հերոսի հուշաքարի պատվանդանին:
Աշոտ Ղուլյանի անունը կրող Ստեփանակերտի N2 դպրոցի պատմության ուսուցչուհի Կարինե Դադայանն իր ելույթում ասել է, որ օգոստոսի 24-ը հայոց նորագույն պատմության մեջ հիշատակվում է որպես խոնարհումի, նվիրումի, ազգային արժանապատվության և հիշատակի օր:
«Աշոտ Ղուլյանի անունը լսելիս այսօրվա սերունդները զգում են իսկական հերոսի կերպարը:Կերպար, որն իր մեջ մարմնավորում է քաղաքական միտքը, ռազմահայրենասիրական ոգին և աստվածային ճշմարտությունը»,-մասնավորապես ասել է Կ. Դադայանը:
Աշոտ Ղուլյանի անունը կրող N զորամասի առաջին վաշտի զինծառայող, կրտսեր սերժանտ Արտաշես Բաբայանը՝ խոսելով Բեկորի մասին, նշել է, որ վերջինս եղել է բնածին զինագործ:
«1988 թվականին ծավալված Արցախյան շարժման սկզբնական շրջանում, երբ ընդհատակում գործող կամավորների համար դժվար էր հայթհայթել զենք ու զինամթերք, որի պահանջարկն անչափ զգացվում էր, Բեկորը սկսել էր պատրաստել ինքաշեն նռնակ, նռնականետ, 16 գծանի կարճափող հրացան և այլ տեսակի զենքեր: Արցախում նա առաջիններից մեկն էր, ով մտածել է կամավորականներից կանոնավոր ստորաբաժանումներ ձևավորելու մասին, և 1991 թվականին իր անմիջական մասնակցությամբ կազմավորվեց առաջին վաշտը, որի հիմնադիր-հրամանատարը դարձավ հենց ինքը՝ Բեկորը»,-ավելացրել է Ա. Բաբայանը:
Ըստ Աղվանստանի պատերազմի վետերանների միության նախագահ Վահրամ Ղահրամանյանի՝ Ա. Ղուլյանի անվան առաջին վաշտի առաջին դասակը կազմավորվել է աղվանցիներից, որոնք իրենց մարտական պատրաստվածությունը բերելով՝ ապահովել են հաղթանակներ արցախյան ճակատներում:
Ըստ Վ. Ղահրամանյանի՝ Բեկորը հայ ժողովրդի մտապատկերում մնացել է հայրենասեր, հոգատար ու ժպտերես անձնավորություն: Նրա կերպարն ամբողջացնում է հայ ժողովրդի հաղթանակները:
Բեկորի այրին՝ Նելլի Ղուլյանը ներկաների հետ կիսելով 27 տարիների իր ցավն ու վիշտը՝ իր ընտանիքի անունից շնորհակալություն է հայտնել բոլոր նրանց, ովքեր մշտապես հիշում և մեծարում են Ա. Ղուլյանին: Նա նաև նշել է, որ ուրախալի է այն հանգամանքը, որ ԱՀ բռնցքամարտի ֆեդերացիան այսօր կազմակերպել է Աշոտ Ղուլյանի անվան բռնցքամարտի հուշամրցաշար:
Ելույթներով հանդես են եկել նաև Աշոտ Ղուլյանի անունը կրող Ստեփանակերտի N2 դպրոցի աշակերտները և ՊԲ N զորամասի գնդերեց Մանավազդ սարկավագ Մկրտչյանը: