Հայկական բանակն այսօր 23 տարեկան է:
Հայկական բանակը 23 տարեկան է. գեներալները բանակի հաջողությունների ու թերությունների մասին
ՍՏԵՓԱՆԱԿԵՐՏ, 28 ՀՈՒՆՎԱՐԻ, ԱՐՑԱԽՊՐԵՍ։1992թ-ին՝ հենց Արցախյան հերոսամարտի օրերին դրվեց մեր բանակի ստեղծման հիմքը: Չնայած առկա թերություններին՝ Հայկական բանակը կարողանում է ամուր պահել հայրենիքի սահմանները: Այս տարիների ընթացքում բանակի ձեռքբերումների ու բացթողումների մասին Tert.am-ը զրուցեց Արցախյան ազատամարտի հերոսներ, գեներալ-մայոր Ֆելիքս Գզողյանի, գեներալ-մայոր Աստվածատուր Պետրոսյանի և գեներալ-մայոր Արկադի Տեր-Թադևոսյանի՝ Կոմանդոսի հետ:
Գեներալ-մայոր Ֆելիքս Գզողյանը նախ Հայկական բանակին խաղաղ երկինք մաղթեց, իսկ հետո հիշեցրեց, որ սահմանին կյանքը լարված է, բայց բոլորս միասին պետք է պայքարենք ու անցնենք դժվարությունների միջով:
«Մեր բանակի մարտունակությունը, ինչպես տարիներ առաջ, այնպես էլ այսօր շատ բարձր է: Շատ լավ գերագույն հրամանատար ունենք, որը բանակի մարտունակությունը միշտ բարձր է պահում: Խաղաղ երկինք թող լինի, մեր զինվորը, մեր ազգը թող խաղաղության մեջ ապրեն, ինչքան զոհ էլ որ տվել ենք, միշտ հիշենք, որ իրենք հպարտորեն կատարել են իրենց պարտականությունները»,- ասաց գեներալը:
Ֆելիքս Գզողյանն այն համոզմունքը հայտնեց, որ ինչպես 1990թ-ին էր հայ զինվորնը հակառակորդին ճնշում, այդպես էլ անում է հիմա:
«Շատ ցավում ենք, որ մեր երեխաները զոհվում են, բայց դա մեր ազգի, մեր սահմանի պաշտպանությունն է: Սովետական Միության ժամանակ էլ էին մարդիկ պաշտպանում սահմանները, հիմա էլ նույնն է, այս դեպքում մենք մեր ազգին ենք պաշտպանում»,- ասաց նա:
Գեներալ-մայոր Աստվածատուր Պետրոսյանը ևս ընդգծեց, որ բարձրացել է Հայկական բանակի մարտունակությունը, ինչպես նաև անձնակազմի որակը՝ պրոֆեսիոնալիզմը:«Ինչպես նախարարն է ասում, իսկապես մեզ հարկավոր է գրագետ սպա, և պետք է կոտրել սպայի այն կերպարը, որի մեջ գռեհկություն կա: Այսօր մենք տարբեր երկրներում վերապատրաստված սպայական կազմ ունենք, ինտելեկտուալ առումով ավելի զարգացած զինվորներ, սակայն ամեն դեպքում մոբիլ բանակի զարգացման խնդրիր կա դեռևս»,- ասաց նա:
Գեներալն ընդգծեց, որ Հայկական բանակում կան հատուկ նշանակության այնպիսի ջոկատներ և այնպիսի պրոֆեսիոնալ զինվորականներ, որոնք որ անհրաժեշտության դեպքում կարող են մարտնչել մի ամբողջ քաղաքի կամ դիվիզիայի դեմ:
«Հայ զինվորի գլուխը ոչ մեկի գլխի հետ փոխել չի լինի ու անհրաժեշտ է, որ է՛լ ավելի ամրապնդենք մեր սահմանները: Բայց դրա համար նաև քաղաքական գործընթացի անհրաժեշտություն կա, որ երկու կողմից սահմանին կանգնեցված ավելորդ ուժերը դուրս բերվեն: Պետք է երկու երկրների՝ Հայաստանի ու Ադրբեջանի նոր սերունդը նստի հակառակորդի հետ բանակցային սեղանի շուրջ»,- ասաց նա:
Ինչ վերաբերում է բանակում առկա թերություններին, ապա Աստվածատուր Պետրոսյանն ասաց, որ դրանց մի մասը նաև հասարակության մեջ առկա խնդիրն է:
«Բանակը ամբողջ ժողովրդի զարկերակն է, ինչ-որ ժողովրդի մեջ է, նույնը բանակում է՝ բարքեր, վարքեր: Բանակում պետք է շատ ուշադրություն դարձվի գաղափարական դաստիարակչությանը՝ թե՛ սպայական կազմի հետ, թե՛ զինվորների հետ: Սա դժվարին աշխատանք է, բայց մենք այնպես պետք է անենք, որ երկու տարիների ընթացքում զինվորը կրթված վերադառնա տուն»,- ասաց նա:
Գեներալ-մայոր Արկադի Տեր-Թադևոսյանը՝ նույն ինքը Կոմանդոսը, Հայկական բանակը համեմատեց մարտական մեքենայի հետ և ընդգծեց, որ յուրաքանչյուրս պետք է հպարտանա Հայկական բանակով:
«Ադրբեջանցիները թեև շատ զենք ունեն, բայց մեր մարտական ոգին չունեն: Մեր այսօրվա տղաները գիտեն, որ իրենց ավագ սերունդը հաղթել է, իսկ հակառակորդի սերունդը գիտի, որ իրանց ավագ սերունդը մարտի դաշտից փախել է: Ի՞նչ ոգի կարող են ունենալ: Զենքն ու զինամթերքը ոչ մի բան է, եթե պատրաստվածության մակարդակը ցածր է»,- ասաց նա:
Խոսելով բանակի թերությունների ու ձեռքբերումների մասին՝ Կոմանդոսը ևս այն կարծիք հայտնեց, որ արատավոր մի շարք բարքեր ներթափանցում են հասարակության միջից, սակայն վերջին տարիներին բանակի ներսում տեղի ունեցող միջադեպերը անհամեմատ նվազել են:
«Դրա համար ջանք ու եռանդ չի խնայում բանակի ղեկավարությունը, դա շատ բարդ աշխատանք է: Ես ասեմ, որ այդ խնդիրը ավելի մեծ է ադրբեջանական բանակում, որովհետև մենք մոնո ազգ են՝ օտար ազգի ներկայացուցիչները քիչ թիվ են կազմում, իսկ Ադրբեջանում մոտ 60% ու ավելին այլ ազգերի ներկայացուցիչներ են՝ իրենց ներքին խնդիրներով»,- ասաց նա։
«Բայց վերջին տարիներին մեր բանակը բաց է դարձել. ծնողները առաջ չէին իմանում թե ինչ է կատարվում բանակում, իսկ այսօր զինվորները ունեն իրենց հրամանատարների հեռախոսահամարը, երբ որ ինչ-որ բան է պատահում, կարող են զանգել անմիջապես նրան, որ խնդիրը լուծվի: Ամեն դեպքում, մարդկային հարաբերությունները պետք է բերենք էն մակարդակի, որ յուրաքանչյուր զինվոր զգա, թե ինչ կարևոր դեր ունի հայրենիքի պաշտպանության համար»,- ասաց նա:
