Երևանի քաղաքապետարանի, ՀՀ կրթության, գիտության, մշակույթի և սպորտի, ինչպես նաև ԱՀ մշակույթի, երիտասարդության հարցերի և զբոսաշրջության նախարարությունների համատեղ նախաձեռնությամբ այսօր՝ օգոստոսի 31-ին, Ստեփանկերտի մշակույթի և երիտասարդության պալատում «Երևանի օրերն Արցախում» ծրագրի շրջանակներում կայացել կոմպոզիտոր, ՀՀ արվեստի վաստակավոր գործիչ Տիգրան Մանսուրյանի 80-ամյակին նվիրված համերգային երեկո:
Ստեփանակերտում մեկնարկել է կոմպոզիտոր Տիգրան Մանսուրյանի 80-ամյակին նվիրված համերգային ծրագիրը
ՍՏԵՓԱՆԱԿԵՐՏ, 31 օգոստոսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ երեկոյին երաժշտական կատարումներով հանդես են եկել Հայաստանի պետական կամերային (գլխավոր խմբակավար Ռոբերտ Մլքեյան) և «Վարանդա» երիտասարդական պետական երգչախմբերը (գեղարվեստական ղեկավար Զաքար Քեշիշյան):
Միջոցառմանն ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանը ողջունել է նման նախաձեռնության իրականացումը, որի մեկնարկը տրվում է հենց Արցախում:
Կարևորելով ծրագրի իրականացումը և գնահատելով Տ. Մանսուրյանի վաստակը՝ նախարարը մեզ հետ զրույցում ասել է, որ կոմպոզիտորը ոչ միայն հայ դասական երաժշտության, այլև համաշխարհային հանրաճանաչության հասած հայ երգահան է, որի հոբելյանն Աարցխում նշելը միմիայն պատիվ է:
Լ. Հովհաննիսյանը կոմպոզիտոր Տ. Մանսուրյանին է հանձնել պատվոգիր և խորհրդանշական նվեր:
Հայաստանի պետական կամերային երգչախմբի գեղարվեստական ղեկավար և գլխավոր խմբակավար Ռոբերտ Մլքեյանի խոսքով՝ իր համար մեծ հպարտություն է կրկին Արցախում լինելը:«Արցախում մենք շատ ենք եղել՝ երգել Գանձասարում, Ամարասում, ինչպես նաև տարբեր փառատոների: Առաջիկայում նախատեսում ենք մի քանի ծրագրեր կյանքի կոչել Արցախում: Պետք է խոստովանեմ, որ այստեղի հանդիսատեսը լուրջ է, գրագետ և սրտաբուխ»,-մասնավորապես ասել է Ռ. Մլքեյանը:
Երեկոյի հոբելյարը՝ Տիգրան Մանսուրյանը, իր շնորհակալությունն է հայտնել ծրագրի կազմակերպիչներին և ասել. «Ես միշտ էլ հիացել եմ արցախցիների ոգու արիությամբ և դիմադրելու կարողությամբ, որը նախանձելի է շատերի համար»:
Համերգային երեկոյին ներկա էին Արցախի թեմի առաջնորդ Պարգև Արքեպիսկոպոս Մարտիրոսյանը, Երևանի և Ստեփանակերտի քաղաքապետներ Սուրեն Գրիգորյանը և Հայկ Մարությանը, ԱՀ և ՀՀ Ազգային ժողովի պատգմավորներ, պետական այրեր և այլք:
Տեղեկացնենք, որ վաղը՝ սեպտեմբերի 1-ին, ժամը՝ 20:00-ին Ստեփանակերտի Վերածննդի հրապարակում տեղի է ունենալու Մաեստրո Մանսուրյանի՝ մայրաքաղաքում երկրորդ՝ այս անգամ բացօթյա համերգը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -46-:
