Այսօր` սեպտեմբերի 6-ին, Ստեփանակերտում տեղի է ունեցել արմատներով արցախցի ամերիկահայ գրող Նելլի Ավակովայի բանաստեղծական և արձակ գրքերի շնորհանդեսը:
Ստեփանակերտում կայացել է Նելլի Ավակովայի բանաստեղծական և արձակ գրքերի շնորհանդեսը
ՍՏԵՓԱՆԱԿԵՐՏ, 6 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` միջոցառմանն Արցախի գրական ընտանիքի անդամները հանդես են եկել ելույթներով, որտեղ ներկայացրել են իրենց տեսակետը գրողի ստեղծագործությունների մասին:
Շնորհանդեսին ներկա գրականագետ, բանասիրական գիտությունների դոկտոր, պրոֆեսոր Սոկրատ Խանյանն ասել է, որ Նելլի Ավակովան մի շարք ժողովածուների հեղինակ է, այդ թվում` «Ա~խ, կարոտախտ», «Աշնանային տերևաթափ», «Ոչ քո կանգառը», «Քեզ, Արցախ, իմ մեղեդիները», «Ղարաբաղ… ցավ և հիշողություն», «Ասեք Աստվածներ` որտեղ է ապրում հոգին», «Բախտի հետ մեն-մենակ», «Լաստանավ»:
«Ընթերցելով Նելլիի ստեղծագործությունները` տեսանելի է, որ նա Աստվածանվեր բանաստեղծուհի է: Չնայած նրա ստեղծագործությունները օտարալեզու են և հիմնականում գրվել են արտերկրում, սակայն Նելլի Ավակովան կարողացել է փոխանցել հայկական ոգին և շունչը, ինչը շատ կարևոր է ստեղծագործող յուրաքանչյուր անհատի համար»,- նշել է Ս. Խանյանը:
Նելլի Ավակովայի բանաստեղծությունները թարգմանել և հայ ընթերցողին է ներկայացրել հրապարակախոս, լրագրող Միքայել Հաջյանը: Հպարտությամբ է նշում, որ նրա տողերում հայկականությունը ավելին է, և յուրաքանչյուր բառում զգացվում է հայրենիքի կարոտն ու ցավը:
«Նրա պոեզիան միաժամանակ մարտնչող գրականության լավագույն օրինակներից մեկն է: Որքան էլ նա քնարական է հոգով և էությամբ, սակայն տեսանելի է գրողի պայքարի երգը, և այդ երգով ոգեշնչում է Արցախում, մայր հայրենիքում և Սփյուքում ապրող մեր հայրենակիցներին»,- նշել է Մ. Հաջյանը:
Իր խոսքում Ն. Ավակովան շնորհակալություն է հայտնել ներկաներին` գրքերի շնորհանդեսին և հոբելյանական ծննդյան 70-ամյակին նվիրված միջոցառմանը ներկա գտնվելու համար:
Նա նշել է, որ մեծ պատիվ է իր համար գտնվել Արցախում և հայրենակիցների հետ մեկտեղ կիսել այդ ուրախությունը:
Ն. Ավակովան կարևորել է Մ. Հաջյանի կատարած աշխատանքը և նշել, որ թարգմանություններում պահպանվել է բանաստեղծական հայաշունչ ոգին:
Շնորհանդեսին ԱՀ Գրողների միության կողմից գրողին է հանձնվել շնորհակալագիր: Հաջորդիվ ցուցադրվել է նրա մասին պատմվող ֆիլմը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -43-:
