ՍՏԵՓԱՆԱԿԵՐՏ, 8 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` այս մասին լրագրողների հետ ճեպազրույցում ասել է ԱՀ Ազգային ժողովի նախագահ Աշոտ Ղուլյանը:

Նրա խոսքով` բոլոր թեկնածուների կողմից եղել է  բաց և թափանցիկ նախընտրական արշավ, որի ընթացքում ընտրողները հնարավորություն են ունեցել առանձնացնել իրենց համար նախընտրելի թեկնածուներին:

«Վստահ եմ, որ շատերի մոտ գերակայում է այն մտածողությունը, որ առաջիկա տարիներին մենք պետք է ունենանք շատ ավելի բարեկարգ քաղաք: Ստեփանակերտը միշտ էլ աչքի է ընկել իր մաքրությամբ և մայրաքաղաքային կոլորիտով, սակայն ժամանակները փոխվում են, և կարծում եմ` առաջիկա տարիներին լինելու են շատ ավելի մեծ պահանջներ: Այս ընտրություններին ընտրված համայնքի ղեկավարներից և ավագանու անդամներից ունենալու ենք մեծ սպասումներ:  Իհարկե, ամեն անգամ մենք ականատես ենք լինում նոր ծրագրերի իրականացման, սակայն դրանք բավարար չեն: 2020 թ.-ի Ստեփանակերտը պետք է բոլորովին ուրիշ լինի»,- նշել է Ա. Ղուլյանը:

Խորհրդարանի ղեկավարի խոսքով` միաժամանակ այս ընտրությունները հնարավորություն են, որպեսզի քաղաքական ուժերը և մարդիկ, ովքեր քաղաքական պայքարի ցանկություն ու հավակնություն ունեն, կարողանան նաև փորձարկել իրենց ուժերը և ստանալ հանրության գնահատականը:

Ա. Ղուլյանը կարծում է, որ ամեն մի ընտրություն Արցախի Հանրապետության համար լրացուցիչ հնարավորություն է միջազգային ճանաչման ճանապարհին պետականության հասունությունը և ժողովրդավարության մակարդակը տեսանելի դարձնելու համար:

Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -24-: