ՍՏԵՓԱՆԱԿԵՐՏ, 11 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` այս մասին այսօր Խորհրդարանում կայացած հանդիպմանն ասել է Ֆրանսիայի Ազգային ժողովի պատգամավոր, «Ֆրանսիա-Արցախ» Բարեկամության շրջանակի անդամ Դանիել Կազարյանը:

Նա նշել է, որ երկրագնդի այս տարածաշրջանում հազվադեպ է պատահում, երբ, շրջապատված լինելով դիկտատուրական տարբեր ռեժիմներով, մարդիկ ունենում են ժողովրդավարական կենսունակություն:

Ֆրանսիացի պատգամավորի կարծիքով` Արցախը հենց այդպիսին է, ինչը պատիվ է բերում նրան: «Այդ է վկայում արցախցիների կողմից կայուն ապագա ստեղծելու հաստատակամությունը: Մենք խոսում ենք արցախցիների խաղաղության, անվտանգության, պարզապես ապրելու հաստատակամության մասին, և այդ հաստատակամությունը վստահաբար կարող եմ ասել, որ սատարվում է հայկական Սփյուռքի, մասնավորապես` Ֆրանսիայում ապրող հայերի կողմից: Չնայած այն շրջափակված վիճակին, որում արցախցիները ապրում են, սակայն պետք է նշեմ, որ նրանք մենակ չեն: Ֆրանսիայում շատերն են արցախցիներին սատարում և լսելի դարձնում նրանց ձայնը, ինչպես նաև ժողովրդավարական պետություն կառուցելու ցանկությունը: Այսօր դժբախտաբար Արցախի և Ֆրանսիայի քաղաքների միջև կնքված հռչակագրերի մի մասը չեղարկվել է, որոշներն էլ գտնվում են իրավական դաշտում, ինչի համար խորապես ափսոսում եմ: Համոզված եմ` բարեկամությունը երբեք չի կարող ժողովուրդների միջև խաղաղության համար խոչընդոտ հանդիսանալ»,- մասնավորապես նշել է Դ. Կազարյանը:

Ֆրանսիայի Ազգային ժողովի պատգամավորը կարևորել է ընդհանուր խաղաղության կառուցման գործում հակամարտության բոլոր կողմերի մասնակից լինելը:

Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -41-: