Արցախի Հանրապետության նախագահ Բակո Սահակյանի հետ քննարկել ենք համատեղ աշխատանքների մի քանի ուղղություններ:
Արցախի հանրային հեռուստատեսությունը պետք է ունենա շուրջօրյա եթեր. Տիգրան Հակոբյան
ՍՏԵՓԱՆԱԿԵՐՏ, 13 սեպտեմբերի, ԱՐՑԱԽՊՐԵՍ: ԱՀ նախագահի հետ հանդիպումից հետո այս մասին «Արցախպրես»-ի թղթակցի հետ զրույցում ասել է Հայաստանի Հանրապետության հեռուստատեսության և ռադիոյի հանձնաժողովի ղեկավար Տիգրան Հակոբյանը:
Նրա խոսքով՝ հանդիպմանը քննարկել են 2020 թվականին կայանլիք նախագահական ընտրությունների հարցը, որը պետք է լինի օրինակելի:
«Մենք փորձում ենք այնպես անել, որ Արցախի հանրային հեռուստաընկերությունը և մյուս հեռարձակողները համապատասխանեն տեղեկատվական հոսքերի այն պահանջներին, որոնք գործում են բոլոր զարգացած պետություններում. դրանք են բոլոր թեկնածուների համար հավասար պայմանների ապահովվումը, հանրային բանավեճերի կազմակերպումը այլն: Այդ հավասարության արդյունքում ոչինչ կասկածի տակ չի դրվի: Երկրորդ հարցը վերաբերում էր Արցախի հանրային հեռուստառադիոընկերությանը: Ցավոք, մինչև այսօր հանրային ռադիոնընկերությունն աշխատում է սահմանփակ դաշտում, և այդ ոլորտի աշխատակիցները հնարավորություն չեն ունենում ընկալելու և ձեռքբերելու արտասահմանյան փորձը: Մենք միասին կգտնենք լուծումներ և եղանակներ, որպեսզի այդ ոլորտի աշխատակիցները հնարավորություն ունենան, ոչ միայն ՀՀ-ում, այլև արտերկրում, մասնակցելու տարբեր միջոցառումների, կոնֆերանսների: Հանդիպմանը քննարկել ենք նաև Հայաստանի և Արցախի հեռարձակողների կողմից ճանապարհային քարտեզ մշակելու հարցը. այդ գաղափարը ողջունել է նախագահը և դրա իրականացման գործում իր աջակցությունը հայտնել»,- մասնավորապես ասել է Տ. Հակոբյանը:
Նա ընդգծել է, որ Արցախի հանրային հեռուստատեսությունը պետք է ունենա շուրջօրյա եթեր, իսկ դրա համար պետք է լինեն համապատասխան կադրեր, տեխնիկական հագեցվածություն և այլն:
Մեր զրոցակիցը նշել է նաև, որ իրենք նախատեսում են խորհրդակցել ՀՀ-ում գործող այն հեռուստաընկերությունների հետ, որոնք ունեն լավ ծրագրեր և պահոցներ, սակայն մեծ մասն Արցախի հեռուստադիտողը հնարավորություն չունի դիտելու:
Ըստ Տ. Հակոբյանի՝ կարևոր է, որ Արցախի հեռուստատեսությունն ունենա այնպիսի բովանդակություն, որը հեռուստադիտողի համար կլինի դիտելի և գրավիչ: Արցախն իր ձայնով պետք է իր ներկայությունն ապահովի Հայաստանի հեռարձակման դաշտում:
«Քննարկել ենք նաև համատեղ սերիալ նկարահանելու մասին հարցը: Սերիալը կպատմի Արցախի պատմության և առօրյայի մասին. այն հնարավոր կլինի թարգմանել տարբեր լեզուներով և տարածել գաղթօջախներով: Մոտակա օրերին մենք կկազմենք և՛ մեր աշխատանքների ծրագրերը, և՛ ճանապարհային քարտեզը. կփորձենք նախանշված անելիքներն իրականացնել արդյունավետ»,- ավելացրել է Տ. Հակոբյանը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -28-:
