Այսօր՝ սեպտեմբերի 28-ին, Ստեփանակերտի մշակույթի և երիտասարդության պալատում կայացել է «Միստիկ երկիր Առան» վերնագրով վավերագրական-խաղարկային ֆիլմի պրեմիերան՝ նվիրված Արցախի թեմի վերաբացման 30-ամյակին:
Ստեփանակերտում կայացել է «Միստիկ երկիր Առան» վերնագրով վավերագրական-խաղարկային ֆիլմի պրեմիերան
ՍՏԵՓԱՆԱԿԵՐՏ, 28 սեպտեմբերի, ԱՐՑԱԽՊՐԵՍ: Վավերագրական-խաղարկային ֆիլմը նկարահանվել է արմատներով արցախցի ռուսատանաբնակ Արթուր Ջալալովի անմիջական ֆինանսավորմամբ: Ֆիլմի տևողությունը մեկ ժամ է:
«Արցախպրես»-ի թղթակցի հետ զրույցում ֆիլմի սցենարի հեղինակ Լևոն Գալստյանն ասել է, որ ֆիլմի նկարահանման մտահղացումը՝ Արցախի թեմի առաջնորդ Պարգև Արքեպիսկոպոս Մարտիրոսյանինն է:
Նրա խոսքով՝ ֆիլմում ներկայացված են այն դրվագները, որոնք լավագույնս են ի ցույց դնում արցախցու անկոտրում ուժը, Արցախի աներևակայելի դիմադրողականությունը, պայքարելու և իր հայրենիքում ազատ ապրելու կամքը:
«Առանն Արցախ աշխարհի հնագույն անվանումն է:Մենք փորձել ենք ներկայացնել Արցախի ֆենոմենի գաղտնիքի կենսունակությունը: Նկարահանումների ժամանակ իր խորհուրդներով մեզ օգնել է Արցախի թեմի Առաջնորդ Պարգև Արքեպիսկոպոս Մարտիրոսյանը: Նա այսպիսի մի միտք է ընդգծել, որ անունն էությունից է բխում, իսկ էությունից բխում է առաքելությունը: Ֆիլմում փորձել ենք ցույց տալ թե ինչ հոգևոր առաքելություն ունի Արցախը՝ առհասարակ համաշխարհային քաղաքակրթական տարածքում: Արցախի մասին գրվել, գրվում և նկարահանվում են շատ ֆիլմեր. «Միստիկ երկիր Առան» ֆիլմը մի ուրույն հայացք է դեպի Արցախը»,-մասնավորապես ասել է Լ. Գալստյանը:
Նա նշել է նաև, որ ֆիլմի սցենարը գրելու ժամանակ իրենք օգտվել են մի քանի պատմական աղբյուրներից, մասնավորապես՝ պատմաբաններ Լեոյի, Բագրատ Ուլուբաբյանի, ԱՀ ազգային ժողովի փոխնախագահ Վահրամ Բալայանի, ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյնի աշխատություններից:
Ֆիլմի գլխավոր ռեժիսոր Հրանտ Մովսիսյանի խոսքով՝ նկարահանումները տևել են շուրջ մեկ տարի: Ֆիլմում նկարահանվել են Արցախում ապրող տարբեր տարիքի ու զբաղմունքի մարդիկ:
«Ֆիլմում ներկայացված է Արցախի հերոսական ու շրջադարձային դրվագներ, ինչպես նաև հայ ժողովրդի հոգևոր մաքառման ողջ ընթացքը ոչ միայն փաստերի, այլև հոգևոր կենսագրության միջոցով: Երկիր ներկայացնելն այնքան էլ հեշտ գործ չէ: Մենք փորձել ենք ներկայացնել թե ինչպիսի դրախտային երկիր է Արցախը, որի մասին շատերը տեղյակ չեն, կամ էլ գիտեն միայն որպես հակամարտության գոտի: Այս ֆիլմը պետք է տեսնել ու հետևություններ անել Արցախի և այստեղ ապրող հերոսական ժողովրդի մասին: Ֆիլմը կցուցադրվի տարբեր երկրներում և բոլորը հնարավորություն կունենան պատկերացում կազմել Արցախի մասին»,- ավելացրել է Հ. Մովսիսյանը՝ նշելով, որ ֆիլմն արդեն ունի ռուսերեն թարգմանություն. նախատեսվում է ունենալ նաև անգլերեն տարբերակ:
Ֆիլմի պրեմիերային ներկա էին ԱՀ նախագահ Բակո Սահակյանը, ԱՀ երկրորդ նախագահ Արկադի Ղուկասյանը, Արցախի թեմի առաջնորդ Պարգև Արքեպիսկոպոս Մարտիրոսյանը, ԱՀ Ազգային ժողովի նախագահ Աշոտ Ղուլյանը, պետական նախարար Գրիգորի Մարտիրոսյանը, հովանավոր՝ Արթուր Ջալալովը, պետական այլ այրեր, հյուրեր և այլք: 
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -53-:
