ԱՀ գյուղատնտեսության նախարարության նախաձեռնությամբ Մարտունու շրջանի Կարմիր շուկա համայնքում կազմակերպվել է «Գյուղատնտեսության ներկան և ապագան» խորագրով գիտագործնական կոնֆերանս:
Կարմիր շուկայում կազմակերպվել է «Գյուղատնտեսության ներկան և ապագան» խորագրով գիտագործնական կոնֆերանս
ՍՏԵՓԱՆԱԿԵՐՏ, 2 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ԱՀ գյուղատնտեսության նախարար Ժիրայր Միրզոյանը:
Նա ասել է, որ գիտագործնական կոնֆերանսը նվիրված է գյուղատնտեսության աշխատողի մասնագիտական օրվան, որը նշվելու է հոկտեմբերի 13-ին:
«Այս տարի տոնին ընդառաջ երկու շաբաթվա մեջ կազմակերպելու ենք գիտագործնական կոնֆերանսներ, որն ընդգրկելու է գյուղատնտեսության ոլորտի հիմնական առանցքային ուղղությունները՝ ներառյալ գիտական, գործնական և պետական ծրագրերին վերաբերող հարցեր: Գյուղատնտեսության ոլորտում առաջնային հարցը համարվում է մասնագիտական որակավորումը: Մենք փորձում ենք գիտությունն ու ուսուցումն առաջնահերթ դարձնել գյուղատնտեսության կողմից տարվող քաղաքականության մեջ: Ձեռնարկելով նման միջոցառումներ, մենք նպատակ ունենք այն դարձնել ավանդական, որպեսզի հնարավորություն ունենանք ճիշտ օգտագործել արդի տեխնոլոգիաները»,-մասնավորապես ասել է Ժ. Միրզոյանը:
ԱՀ Ազգային ժողովի արտադրության և արտադրական ենթակառուցվածքների հարցերի մշտական հանձնաժողովի նախագահ Արպատ Ավանեսյանն իր խոսքում կարևորել է նման կոնֆերանսի կազմակերպումը, որն իր դրական արդյունքները պետք է ունենա:
«Ցանկացած գյուղատնտեսական երկիր, որն ունի այսպիսի գիտական և գործնական աշխատանքներ իրականացնող ներուժ, պարտավոր է պարբերաբար իրականացնել այս կարգի կոնֆերանսներ: Այն թեմաները, որոնք նախատեսված են հանրապետության տարբեր վայրերում ներկայացնել՝ արդիական են ու պահանջված»,-ավելացրել է Ա. Ավանեսյանը:
Շուշիի տեխնոլոգիական համալսարանի ռեկտոր Հովհաննես Թոքմաջյանն էլ ասել է, որ Արցախը բնակլիմայական առումով լինելով բարենպաստ գոտի, ունի իր առանձնահատկությունները, որոնք պետք է մոտ ապագայում կանխորոշեն գյուղատնտեսության զարգացումը:
«Մենք ունենք առանձնահատկություններ, որոնք պետք է հաշվի առնենք: Համոզված եմ, որ պետք է լուրջ զբաղվենք գյուղատնտեսությամբ՝ չօգտագործելով մեծաքանակ քիմիկատներ: Արցախի բնակլիմայական առանձնահատկությունները թույլ են տալիս նաև այստեղ զարգացնել բժշկագիտության մեջ օգտագործվող այն նյութերը, որոնք պարունակում են այստեղ աճող բույսերը՝ մանավանդ թունավոր բույսերի եթերայուղերը: Այս ուղղությամբ մեր համալսարանում կատարվում են հետազոտություններ»,-մասնավորապես ասել է Հովհ. Թոքմաջյանը՝ նշելով, որ ժամանակն է օգտագործել նոր տեխնոլոգիաներ:
Այնուհետև պտղաբուծության, բույսերի պաշտպանության, բուսաբուծության զարգացմանն ուղղված պետական ծրագրերի, հողի մակերեսային մշակության վերաբերյալ թեմաներով հանդես են եկել Հայաստանի ազգային ագրարային համալսարանի դասախոս Արա Հովհաննիսյանը, բուհի դեկան Արմենակ Տեր-Գրիգորյանը, ԱՀ գյուղատնտեսության փոխնախարար Վիլեն Ավետիսյանը և մենատնտես Վաչե Ադամյանը:
ՀՀ ջերմոցային տնտեսությունների զարգացման և տեխնոլոգիական նվաճումների մասին զեկույցով հանդես է եկել ՀՀ էկոնոմիկայի նախարարի խորհրդական Սյուզաննա Հովսեփյանը:
Նրա խոսքով՝ Հայաստանի փորձը պետք է օրինակ հանդիսանա Արցախում ջերմոցային տնտեսությամբ զբաղվողների համար:
«Կարելի է սկսել փոքր և միջին ջերմատնային տնտեսություններից, այնուհետև հստակեցնել, թե որ մշակաբույսերն ինչ տեխնոլոգիաներով կարելի է ավելի արդյունավետ աճեցնել: Հաշվի առնելով Հայաստանի շուկայի պահանջարկը, խորհուրդ կտայի այստեղ ավելի շատ զբաղվել հատապտղային մշակաբույսերի աճեցմամբ, որի համար բարենպաստ են Արցախի կլիմայական պայմանները: Նույնիսկ կարելի է նոր մշակաբույսեր փորձարկել»,-նշել է Ս. Հովսեփյանը:
Գիտագործնական կոնֆերանսի վերջում կազմակերպվել է քննարկում:
Կոնֆերանսին ներկա էին Մարտունու շրջվարչակազմի ղեկավար Արարատ Մելքումյանը, գյուղնախարարության ներկայացուցիչներ, հողագործներ:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -44-:
