Պաշտպանության բանակի «Տիգրանակերտ» զորավարժարանում այսօր ԱՀ նախագահ Բակո Սահակյանը «Մարտական ծառայություն» մեդալներով պարգևատրել է սեպտեմբերի 23-ին հարավ-արևելյան ուղղությամբ ադրբեջանական հատուկ ջոկատայինների դիվերսիոն ներթափանցման փորձը կանխած զինծառայողներ Արմեն Բաբայանին ու Էմիլ Ներսիսյանին, ինչպես նաև սեպտեմբերի 25-ին Ակնայի հատվածում հետախուզական թռիչք իրականացնող հակառակորդի «ORBITER-2» տիպի անօդաչու թռչող սարքը խոցած Պարույր Ամիրխանյանին ու Ռաֆիկ Օրդոյանին:
Մենք միշտ զգոն ենք և հակառակորդի յուրաքանչյուր գործողության տալու ենք համարժեք պատասխան. զինծառայող
ՍՏԵՓԱՆԱԿԵՐՏ, 3 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում Պարույր Ամիրխանյանը՝ անդրադառնալով հակառակորդի անօդաչու թռչող սարքը խոցելուն, ասել է, որ իրենց ստորաբաժանումը կրելով շուրջօրյա մարտական հերթապահություն և ստանալով վերադաս հրամանատարության ցուցումը՝ օդային տարածության տվյալ հատվածում հակառակորդի անօդաչու թռչող սարքի գոյության մասին, անմիջապես կատարել են համապատասխան միջոցառումներ, որի արդյունքում խոցվել է հակառակորդի «ORBITER-2» տիպի անօդաչու թռչող սարքը:
«Նման դեպքեր լինում են և հակառակորդը միշտ էլ ստանում է իրեն արժանի պատասխանը: Հավաստիացնում եմ, որ օդային տարածությունն ամբողջությամբ վերահսկվում է, և հակառակորդի ցանկացած օդային ոտնձգություն այսուհետ ևս կարժանանա համարժեք պատասխանի»,-նշել է Պ. Ամիրխանյանը:
Հարավ-արևելյան ուղղությամբ ադրբեջանական հատուկ ջոկատայինների դիվերսիոն ներթափանցման փորձը կանխած զինծառայող Արմեն Բաբայանն էլ ասել է, որ հակառակորդը հերթական անգամ փորձել է մխրճվել ՊԲ դիրքը, որն էլ դիրքի անձնակազմի ճիշտ և ժամանակին կատարած գործողությունների արդյունքում կասեցվել է:
«Մենք միշտ զգոն ենք և հակառակորդի յուրաքանչյուր գործողության տալու ենք համարժեք պատասխան»,-նշել է Ա. Բաբայանը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -41-:
