ԱՀ գյուղատնտեսության նախարարության նախաձեռնությամբ Ասկերանում այսօր կազմակերպվել է «Գյուղատնտեսության ներկան և ապագան» խորագրով գիտագործնական կոնֆերանսի երրորդ փուլը, որը նվիրված էր ոռոգման համակարգերին և տեխնոլգիաներին:
Ասկերանում կազմակերպվել է «Գյուղատնտեսության ներկան և ապագան» խորագրով գիտագործնական կոնֆերանսի երրորդ փուլը
ՍՏԵՓԱՆԱԿԵՐՏ, 8 հոկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ կոնֆերանսին բացման խոսքով հանդես է եկել ԱՀ գյուղատնտեսության նախարար Ժիրայր Միրզոյանը:
Նրա խոսքով՝ ոռոգման համակարգերի և տեխնոլգիաների ոլորտը գյուղատնտեսության կարևոր մասն են կազմում:
«Այսօրվա գիտագործնական կոնֆերանսը խթան կհանդիսանա, որպեսզի ոռոգման համակարգերի և տեխնոլգիաների ոլորտում առաջընթաց գրանցենք: ԱՀ-ն մակերևույթային, խորքային, գրունտային ջրերի առումով ունենք խիստ սահմանափակ քանակ, ինչպես նաև աշխարհագրորեն ունենք անհամաչափ բաշխվածություն, որն էլ բերում է բուսաբուծության ճյուղի համար տարածքային զարգացման անհամաչափությունների: Բուսաբուծության ճյուղը խիստ կախված է ոռոգման համակարգերից և տեխնոլոգիաներից: Այդ խնդիրները հաղթահարելու համար պետք է քայլել ժամանակին համընթաց: Այս ոլորտում անհրաժեշտ է իրականացնել լուրջ բարեփոխումներ: Վստահ եմ, որ մենք հետևություններ ենք անելու համակարգի արդյունավետ կառավարման, ջրային ռեսուրսների արդյունավետ օգտագործման ուղղությունենրով»,- մասնավորապես ասել է գյուղնախարարը:
ԱՀ գյուղատնտեսության փոխնախարար Վիլեն Ավետիսյանի խոսքով՝ գիտագործնական կոնֆերանսը նպատակ ունի ԱՀ-ն հողօգտագործողներին ծանոթացնել միջազգային պրակտիկայում կիրառվող վերջին նորություններին, ինչպես նաև Արցախում գյուղատնտեսության ոլորտում լուրջ հաջողություններ գրանցած այն անձանց, ովքեր օգտագործում են նոր տեխնոլոգիաներ:
Ըստ Վ. Ավետիսյանի՝ ԱՀ-ում կան բավարար քանակությամբ ջրային ռեսուրսներ, սակայն այդ ռեսուրսների օգտագործման և պահպանման հետ կապված առկա են մի շարք թերություններ, որոնք պետք է շտկվեն:
«Կոնֆերանսի շրջանակներում մենք առանձին պայմանավորվածություն ենք ձեռք բերել հրավիրված մասնագետների հետ:
Կփորձենք կազմակերպել հանդիպումներ՝ ունենալով ընդլայնված քննարկումներ, որտեղ կհստակեցնենք մեր հետագա անելիքները»,-նշել է Վ. Ավետիսյանը:
Կոնֆերանսի մասնակից Շուշիի տեխնոլոգիական համալսարանի տնտեսագիտության ասպերանտուրայի հայցորդ, ագրոձեռնարկատեր Արամ Վերդյանը մեզ հետ զրույցում ասել է, որ յուրաքանչյուր տնտեսվարող սուբյեկտ պետք է գիտակցի, որ առանց գիտության դժվար է առաջընթաց գրանցել որևէ գործում:
Նրա խոսքով՝ նման կոնֆերանսները հնարավորություն են տալիս, որպեսզի ԱՀ-ում ապրող գյուղատնտեսները հանդես գան մտքերի և փորձի փոխանակմամբ:
Կոնֆերանսին ոռոգման համակարգերի և տեխնոլգիաների վերաբերյալ թեմաներով հանդես են եկել գյուղատնտեսության տարբեր ոլորտների մասնագետներ՝ ԱՀ-ից և ՀՀ-ից, ովքեր պատասխանել են նաև միջոցառման մասնակիցների հարցերին և լսել նրանց առաջարկները:
Կոնֆերանսին ներկա էին Ասկերանի շրջվարչակազմի ղեկավար Հակոբ Ղահրամանյանը, գյուղոլորտի ներկայացուցիչներ և հյուրեր:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -37-:
