Ռուսաստանի իշխանությունները հույս են հայտնել, որ հնարավոր կլինի կարգավորել հարաբերությունները Թբիլիսիի հետ՝ վերադառնալով այն մակարդակին, որ եղել է հունիսյան իրադարձություններից առաջ:
Մոսկվան Թբիլիսիի հետ հարաբերությունները կարգավորելու հույս է հայտնել
ՍՏԵՓԱՆԱԿԵՐՏ, 9 հոկտեմբերի, ԱՐՑԱԽՊՐԵՍ: Այդ մասին, մեկնաբանելով երկու երկրների արտգործնախարարների հանդիպումը Նյու Յորքում՝ Գլխավոր ասամբլեայի 74-րդ նստաշրջանի շրջանակում, ասել է Ռուսաստանի փոխարտգործնախարար Անդրեյ Ռուդենկոն, փոխանցում է tert.am-ը:
«Նախարարների խոսակցությունը կոնկրետ էր: Հուսով ենք, որ Ռուսաստանի Դաշնության կողմից ուղարկված ազդանշանը կհասնի վրացական կողմին: Հուսով ենք նաև, որ երկու երկրների հարաբերությունները կկարգավորվեն», - ասել է Ռուդենկոն:
Հիշեցնենք, որ հունիսի վերջին Թբիլիսիում բողոքի ակցիաներ էին սկսվել այն բանից հետո, երբ Ուղղափառության միջխորհրդարանական վեհաժողովի Գլխավոր ասամբլեայի նստաշրջանի ընթացքում Ռուսաստանի պատվիրակ Սերգեյ Գավրիլովը ելույթ էր ունեցել՝ Վրաստանի խորհրդարանի նախագահի աթոռին նստած: Միջադեպը վրդովեցրել էր ընդդիմությանը, որը մայրաքաղաքում հավաք էր կազմակերպել:
Ռուսաստանի իշխանությունները հուլիսի 8-ից անորոշ ժամանակով դադարեցրել են օդային հաղորդակցությունը Վրաստանի հետ:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -12-:
