ՍՏԵՓԱՆԱԿԵՐՏ, 12 հոկտեմբերի, ԱՐՑԱԽՊՐԵՍ: «Արցախպրես»-ի  թղթակցի հաղորդմամբ՝  միջոցառմանը  բացման  խոսքով  հանդես  է   եկել  ԱՀ գյուղատնտեսության նախարար  Ժիրայր  Միրզոյանը:

Նա   ասել է, որ   կոնֆերանսը, որն  ունի  գիտական  և  գործնական  նշանակություն,    Արցախում  կազմակերպվել  է  առաջին  անգամ:

«Այն    ընդգրկել  է ԱՀ գյուղատնտեսության    նախարարության   կողմից  կառավարվող   առանցքային  բոլոր  ոլորտները    և  նպատակ  ունի   արդիական, ակադեմիական    չափանիշներով  քննելու  և  գնահատելու  բոլոր   գաղափարներն ու  ծրագրերը, ինչպես  նաև   բարձրացնել    տնտեսության  զարգացման վրա    ազդեցությունը: Այս  միջոցառումը  խորհրդանշական    կամ    արարողակարգային    բնույթ   չունի, այն    կազմակերպվել է  օբյեկտիվ    և    գործնական   անհրաժեշտությունից  ելնելով:  Ակնհայտ  է, որ  գիտական  և  գործնական      ոլորտների    կապվածության  և  համագործակցության  աստիճանից  է  կախված    յուրաքանչյուր  բնագավառի  զարգացման   աստիճանը:    Չորս  փուլերից  բաղկացած   կոնֆերանսն  ընդգրկել  է  բուսաբուծության, անասնաբուծության, ոռոգման  համակարգերի, սննդամթերքի  անվտանգության  և  վերամշակման    թեմաները: Այսպիսի  թեմաներ ընտրելով  նպատակ ենք  ունեցել   գյուղատնտեսության ոլորտի  բոլոր  ուղղությունները  ներգրավել   կոնֆերանսի  ծրագրում»,-մանրամասնել է  Ժ.  Միրզոյանը  և  բոլորին  շնորհավորել  գյուղատնտեսի  աշխատողի մասնագիտական  տոնի  առթիվ:

 

ԱՀ  պետական  նախարար  Գրիգորի  Մարտիրոսյանի  խոսքով՝    օրն  առիթ  է  ևս  մեկ  անգամ    կարևորելու  գյուղատնտեսի` որպես  հողի  մշակի,   բերք ու  բարիք  ստեղծողի  դերը:

 

 

«Գյուղատնտեսությունը  եղել  և  շարունակում  է  մնալ    Արցախի  տնտեսության  ռազմավարական    ոլորտներից  մեկը:  Այն  իրականացնում  է    բնակչության`  պարենի  նկատմամբ  կենսական   պահանջմունքների բավարարման  առաքելություն, միաժամանակ`    հանդիսանալով  տնտեսական  աճի    հիմնական  բաղադրիչներից  մեկը  և ապահովելով  զբաղվածություն:   Արցախի      տնտեսապես  ակտիվ   բնակչության  շուրջ  48   տոկոսը  գյուղաբնակ է, որի  մոտ   82  տոկոսն  զբաղված  է    գյուղատնտեսությամբ:  Վերջին  տասնամյակում  ոլորտն  ապահովել է  երկրի     համախառն  արտադրանքի     շուրջ  15  տոկոսը: Գյուղատնտեսի  աշխատանքը  պահանջված  է  ու     դժվարին,  այն  ոչ  միայն  աշխատանք   է և  բիզնես, այլև`  կենսակերպ»,-մասնավորապես  ասել է   Գ. Մարտիրոսյանը:

 

Կոնֆերանսին  մասնակից   ԱՀ  նախագահ   Բակո  Սահակյանն    իր     ելույթում   ասել է, որ   կոնֆերանսում քննարկվող թեմաները հետաքրքիր են ու պահանջված և  առանձնակի տեղ են զբաղեցնում մեր հանրապետության սոցիալ-տնտեսական օրակարգում:

«Գյուղատնտեսությունն Արցախի տնտեսության ավանդական ճյուղերից է և այսուհետ էլ կմնա մեր հանրապետության տնտեսական համակարգի հիմնասյուներից մեկը: Այս ոլորտը գտնվում է պետության մշտական ուշադրության կենտրոնում: Մենք շահագրգռված ենք, որ Արցախի գյուղատնտեսությունը լինի ճկուն, մրցունակ, լայնորեն օգտագործի տարբեր երկրների առաջատար փորձը եւ ժամանակակից տեխնոլոգիաները, բնական է, հաշվի առնելով մեր տեղական յուրահատկությունները: Եվ այս տեսակետից նման միջոցառումների անցկացումն Արցախում պահանջված է»,- ավելացրել   է  Բ. Սահակյանը:

Երկրի ղեկավարը գյուղատնտեսության բնագավառում Արցախի Հանրապետությանը մատուցած ծառայությունների և գյուղատնտեսության զարգացման գործում ունեցած նշանակալի ավանդի համար, ինչպես  նաև  Գյուղատնտեսության աշխատողի օրվա կապակցությամբ «Անանիա Շիրակացի» և  «Երախտագիտություն» մեդալներով պարգևատրել է Արցախի և Հայաստանի Հանրապետության կառավարական, գիտակրթական և գործարար շրջանակների մի խումբ ներկայացուցիչների:

 

Կոնֆերանսին  ելույթով  հանդես  է  եկել  նաև  Շուշիի   տեխնոլոգիական  համալսարնի  ռեկտոր  Հովհաննես  Թոքմաջյանը, որ  կարևորել  և   ողջունել  է    նման  գիտագործնական միջոցառումների  անցկացումն  Արցախում:

Միջոցառմանը   ցուցադրվել  են    գյուղատնտեսության  վերջին  տարիների  ընթացքում   գրանցված   հաջողությունների, ինչպես  նաև    գիտագործնական   կոնֆերանսի     չորս   փուլերի    մասին   պատմվող     տեսանյութեր: