Apple ընկերությունը ամերիկյան արտոնագրային հաստատությանը հայտ է ներկայացրել ոչ մեծ սարքի մասին, որը կարելի է մատին կրել։
Apple-ը «խելացի» մատանի է արտոնագրել
ՍՏԵՓԱՆԱԿԵՐՏ, 22 հոկտեմբերի, ԱՐՑԱԽՊՐԵՍ: Ենթադրվում է, որ խոսքը «խելացի» մատանու մասին է, հայտնում է News.am-ը։
Մատանին ներառում է պրոցեսոր, միկրոֆոն եւ անլար միացման մոդուլ։ Կան նաեւ գործողությունների ֆիքսման հաղորդիչներ եւ ոչ մեծ սենսորային մակերեւույթ, ինչպես նաեւ պտտվող գլխիկ՝ նավիգացիայի համար։
«Խելացի» մատանին ստեղծողների մտահղացմամբ՝ այն միայնակ չի օգտագործվի։ Նմանություններ կան Apple Watch-ի հետ։ Այսինքն այս գաջեթը թույլ կտա կառավարել iPhone-ի եւ iPad-ի որոշ գործառույթներ, նույնիսկ եթե դրանք ձեր ձեռքում չեն։ Փոխգործողությունները կարող են իրականացվել սենսորային գոտու կամ Siri ձայնային հրահանգների միջոցով։
Արտոնագրման հայտի նկարագրության մեջ ասվում է, որ սենսորային էկրաններով սարքերի օգտագործումը կարող է «անհարմար, անարդյունավետ լինել գործունեության եւ հավելվածների որոշակի տեսակների համար», ինչպես նաեւ «անընդունելի լինել մի սոցիալական միջավայրում կամ նույնիսկ վտանգավոր մյուսում»։ Մատանին վտանգավոր իրավիճակներում ահազանգելու եւ ծանուցումներին ու հաղորդագրություններին արագ արձագանքելու հնարավորություն կտա՝ մնալով աննկատ։
Գրանցված հայտի մասին մանրամասների հրապարակումը չի նշանակում, որ մենք պատրաստի ապրանքը շուտով շաուկայում կտեսնենք։ Դա ընդամենը խոսում է այն մասին, որ ընկերությունը հետաքրքրված է այդ կոնկրետ ոլորտով եւ պատրաստվում է պաշտպանել իր ապագա շահերը։
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -48-:
