ԱՄՆ նախագահի ազգային անվտանգության հարցերով նախկին խորհրդական Ջոն Բոլթոնը որոշել է անտեսել Ներկայացուցիչների պալատում Դոնալդ Թրամփի պաշտոնանկության գործընթացի վերաբերյալ լսումներին մասնակցության հրավերը:
Բոլթոնը հրաժարվել է ներկա գտնվել Թրամփի պաշտոնանկության վերաբերյալ լսումներին. WSJ
ՍՏԵՓԱՆԱԿԵՐՏ, 31 հոկտեմբերի, ԱՐՑԱԽՊՐԵՍ: Այս մասին The Wall Street Journal-ին հայտնել է նախկին պաշտոնյայի փաստաբան Չարլզ Կուպերը, հայատնում է Tert.am-ը:
Նրա խոսքով՝ Բոլթոնը «տրամադրված չէ ընդունել դեմոկրատների առաջարկը»:
Նախատեսվում է, որ Բոլթոնն ԱՄՆ Կոնգրեսում ելույթ կունենա նոյեմբերի 7-ին, իսկ ԱԱԽ խորհրդականներ Ջոն Այզենբերգը և Մայքլ Էլլիսը՝ նոյեմբերի 4-ին:
Ավելի վաղ հաղորդվել էր, որ ԱՄՆ նախագահի ազգային անվտանգության հարցերով նախկին խորհրդական Ջոն Բոլթոնին Ներկայացուցիչների պալատից կանչել են ցուցմունք տալու Դոնալդ Թրամփի պաշտոնանկության գործընթացի շրջանակում:
Հայտնի է, որ Բոլթոնը դեռևս նախագահի խորհրդականի պաշտոնում եղած ժամանակ դժգոհություն էր հայտնել Ուկրաինայի նկատմամբ Թրամփի վարչակազմի վարած քաղաքականությունից: Մասնավորապես, նա գոհ չէր ԱՄՆ նախագահի փաստաբան Ռուդոլֆ Ջուլիանիի մասնակցությունից:
ԱՄՆ նախագահի նկատմամբ պաշտոնանկության գործընթացը Կոնգրեսի Ներկայացուցիչների պալատը նախաձեռնել է Ուկրաինայի նախագահ Վլադիմիր Զելենսկիի հետ Դոնալդ Թրամփի հուլիսյան հեռախոսազրույցից հետո: Պարզվել է, որ զրույցի ընթացքում Թրամփն ուկրաինացի գործընկերոջը խնդրել էր հետաքննություն սկսել ԱՄՆ նախկին փոխնախագահ Ջո Բայդենի որդու՝ Հանթեր Բայդենի գործունեության վերաբերյալ: Ի դեպ, Ջո Բայդենը համարվում է 2020 թվականին ԱՄՆ-ում կայանալիք նախագահական ընտրություններում Դոնալդ Թրամփի հիմնական մրցակիցը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -36-:
