«Մատենադարան-Գանձասար» գիտամշակութային կենտրոնում այսօր՝ նոյեմբերի 5-ին, տեղի է ունեցել Արցախի պետական համալսարանի 50-ամյակին նվիրված ուսանողական միջազգային գիտաժողովի փակման արարողությունը:
Կայացել է Արցախի պետական համալսարանի 50-ամյակին նվիրված ուսանողական միջազգային գիտաժողովի փակման արարողությունը (լուսանկարներ)
ՍՏԵՓԱՆԱԿԵՐՏ, 5 նոյեմբերի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ մինչ մեկնելը «Մատենադարան-Գանձասար» գիտամշակութային կենտրոն, գիտաժողովի մասնակիցները ծաղիկներ են խոնարհել ԱրՊՀ զոհված ուսանող-ազատամարտիկների հիշատակը հավերժացնող հուշակոթողին:
Գիտաժողովին բացման խոսքով հանդես է եկել ԱրՊՀ ռեկտոր Արմեն Սարգսյանը:
Նա ասել է, որ միջազգային եռօրյա գիտաժողովին Արցախի, Հայաստանի և արտերկրի բուհերից մասնակցել է շուրջ 150 ուսանող:
Ա. Սարգսյանի խոսքով՝ ներկայումս բարձրագույն կրթության բնագավառում տեղի են ունենում նորանոր փոփոխություններ և առաջ են գալիս նոր մարտահրավերներ, որոնց դիմակայելու լավագույն ձևն աշխարհի տարբեր բուհերի հետ համագործակցելն է:
Անդրադառնալով գիտաժողովի արդյունքներին՝ բուհի ռեկտորը մասնավորապես ասել է.«Ես հանդիպել եմ գիտաժողովի մասնախմբերի ղեկավարների հետ. վերջիններս իրենց գոհունակությունն են հայտնել միջոցառումը հավուր պատշաճի անցակցնելու վերաբերյալ: Ի տարբերություն գիտական այլ միջոցառումների, այս անգամ ուսանողները բավականին ակտիվ քննարկումներ են կազմակերպել, ինչպես նաև որոշ հարցերում հակադարձել բանախոսներին: Գտնում եմ, որ մեր բուհի կողմից նախաձեռնած միջազգային այս գիտաժողովը կայացել է»:
«Մատենադարան-Գանձասար» գիտամշակութային կենտրոնի տնօրեն Արամ Թորոսյանն իր հերթին ողջունել և շնորհավորել է Արցախի Մայր բուհի հիմնադրման 50-ամյակի կապակցությամբ և կարևորել միջազգային գիտաժողովների անցկացումն Արցախում:
Ա. Թորոսյանի խոսքով՝ առաջիկայում Արցախի պետական համալսարանի և «Մատենադարան-Գանձասար» գիտամշակութային կենտրոնի միջև կնքվելու է փոխըմբռնման և համագործակցության հուշագիր:
«Տեղեկացնեմ նաև, որ առաջիկա 15 օրերի ընթացքում «Մատենադարան-Գանձասար» գիտամշակութային կենտրոնում տեղի կունենա գրադարան-ընթերցասրահի բացման արարողություն. աշխարհի ամենամեծ ձեռագրապահոցի ողջ թվային ռեսուրսն անվճար հասանելի կլինի Արցախում: Արդյունքում մենք կունենանք գիտական նոր ուսումնասիրություններ և հետազոտություններ»,-ավելացրել է Ա. Թորոսյանը:
Ելույթներից հետո «Բարձրագույն կրթության արդի հիմնախնդիրները» թեմայով կազմակերպվել է ուսանողական ֆորում, որը ղեկավարում էր ԱրՊՀ ուսանողների, շրջանավարտների և հասարակայնության հետ տարվող աշխատանքների գծով պրոռեկտոր Վիտյա Յարամիշյանը:
Նա խոսել է Արցախի պետական համալսարանի առանձնահատկությունների մասին, ներկաներին տեղեկացրել բուհի ձեռքբերումների, ինչպես նաև անելիքների մասին:
Այնուհետև տարբեր բուհերի ուսանողներ հակիրճ խոսել են իրենց համալսարանների գործունեության մասին, և կարծիքներ հայտնել կազմակերպված միջազգային գիտաժողովի վերաբերյալ:
Գիտաժողովին մասնակից Երևանի պետական համալսարանի ուսանողական գիտական ընկերության արտաքին կապերի հանձնաժողովի նախագահ Սամվել Եղիազարյանը մեզ հետ զրույցում ասել է, որ նման միջոցառումների կազմակերպումը շատ կարևոր և առանձնահատուկ դեր են ունենում ուսանողների կյանքում:
Նա նժել է, որ գիտաժողովը կարևոր է ոչ միայն գիտական ներուժի ներկայացմամբ, այլև՝ աշխարհի տարբեր բուհերում սովորող ուսանողների համախմբման առումով:
Մերձդնեստրի պետական համալսարանի ուսանող Յուրի Կասումյանի խոսքով՝ ինքն առաջին անգամ է այցելում Արցախ:
«Ես շատ տպավորված եմ թե´ Արցախի գեղատեսիլ վայրերով, թե´ արցախցիների ջերմությամբ, անկեղծությամբ ու հյուրասիրությամբ: Մեծ սիրով եմ մասնակցել այս գիտաժողովին, որի ընթացքում կարողացել եմ ձեռք բերել նոր գիտելիքներ, փորձ, ինչպես նաև լավ ընկերներ: Որպես ուսանող շատ եմ կարևորում նման միջոցառումների անցկացումը, որը խթանելու է մեր ունեցած ներուժը ճիշտ օգտագործելուն և այն բազմապատկելուն»,-մասնավորապես ասել է Յու. Կասումյանը:
Ըստ Արցախի պետական համալսարանի ուսանողական խորհրդի փոխնախագահ Արման Ասրյանի՝ նման միջոցառումները նպաստում են բուհերի միջև սերտ կապերի հաստատմանը և համագործակցությանը՝ ինչպես բուհական մակարդակով, այնպես էլ ուսանողների միջև շփումներով:
«Գիտաժողովն առաջին հերթին հնարավորություն է տալիս զարգացնել ուսանողների կրթական հնարավորությունները, ինչպես նաև առիթ է, որպեսզի մի խումբ երիտասարդներ այցելեն Արցախ և մոտիկից ծանոթանան մեր պատմությանն ու պատմամշակությաին արժեքներին»,- ավելացրել է Ա. Ասրյանը:
Գիտաժողովի վերջում միջոցառման մասնակիցներն ստացել են հավաստագրեր:
Գիտաժողովի մասնակիցները շրջայց են կատարել նաև Գանձասարի վանական համալիրում:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -59-:
