Այսօր «Հայկի Սերունդ» հասարակական կազմակերպության հիմնադրման 17-ամյակն է:
Այսօր «Հայկի Սերունդ» հասարակական կազմակերպության հիմնադրման 17-ամյակն է
ՍՏԵՓԱՆԱԿԵՐՏ, 6 նոյեմբերի, ԱՐՑԱԽՊՐԵՍ:«Արցախպրես»-ի թղթակցի հետ զրույցում «Հայկի Սերունդ» ՀԿ նախագահ Արմինե Պետրոսյանն ասել է, որ 17 տարիների ընթացքում կազմակերպությունն ունեցել է բազմաթիվ ձեռքբերումներ և վերելքներ, որին զուգահեռ եղել են նաև մի շարք դժվարություններ:
Ըստ Ա. Պետրոսյանի` կազմակերպության 17 տարիների ընթացքում գրանցված անդամների թիվը հասնում է 500-ի:
«Ներկայումս կազմակերության գրասենյակում իրականացվող շաբաթական դասընթացներին և միջոցառումներին ակտիվ մասնակցություն են ցուցաբերում յոթանասունից ավել երիտասարդներ և պատանիներ, իսկ ամենամսյա արշավներին ակտիվ մասնակցում են հարյուրից ավել երիտասարդներ և պատանիներ։ Մենք համագործակցում ենք այլ կառույցների հետ, այդ թվում` Մայր Հայաստանում և ԱՊՀ անդամ պետություններում գործունեություն ծավալող խոշոր հասարակական միավորումների և համապատասխան պետական լիազոր մարմինների ներկայացուցիչների հետ։ Ունենք համատեղ իրականացված մի շարք ծրագրեր»,-մասնավորապես ասել է ՀԿ-ի նախագահը:
Անդրադառնալով կազմակերպության առաջիկա ծրագրերին և անելիքներին` Ա. Պետրոսյանը տեղեկացրել է նաև, որ 2017 թվականին ՀԿ-ի համագումարի կողմից ընդունված որոշման համաձայն` կազմակերպության հիմնական ուղղվածության գերակա ճյուղերից է հանդիսանում միջազգային համագործակցությունը, համահայկական և միջազգային երիտասարդական հավաքների անցկացումն Արցախում, որի շրջանակում իրականացվող համապատասխան աշխատանքների արդյունքում կազմակերպության անդամները հաճախակի մասնակցություն են ունենում միջազգային տարբեր ծրագրերի։
«Ներկայումս Շուշիի «Հայորդիներ» երիտասարդական ճամբարում ընթանում են ակտիվ շինարարական աշխատանքներ, մասնավորապես վերակառուցվում է խոհանոցը, ճաշարանը, իրային և սննդի պահեստները, խաղահրապարակները, որի արդյունքում գալիք ամառվա շրջանում կարողանալու ենք հյուրընկալել ավելի շատ ճամբարականների»,-նշել է Ա. Պետրոսյանը։