Ստեփանակերտի քաղաքապետարանի մշակույթի տան սաները սպորտային պարերի բաց առաջնությունից վերադարձել են մեդալներով և գավաթներով
Ստեփանակերտի քաղաքապետարանի մշակույթի տան սաները նոյեմբերի 3-ին մասնակցել են Երևանում կայացած «Կաստանիետի» սպորտային պարերի բաց առաջնությանը և գրավել մրցանակային տեղեր:
Ստեփանակերտի քաղաքապետարանի մշակույթի տան սաները սպորտային պարերի բաց առաջնությունից վերադարձել են մեդալներով և գավաթներով
ՍՏԵՓԱՆԱԿԵՐՏ, 8 նոյեմբերի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Ստեփանակերտի քաղաքապետարանի մշակույթի տան պարուսույց Էլեոնորա Հակոբյանը:
Նրա խոսքով՝ առաջնությանը Հայաստանից և Արցախից մասնակցել են ավելի քան 850 պարողներ:
«Ուժեղ մրցակցություն կար պարային թիմերի միջև: Չնայած մեր պարային համույթը մեկ տարի է ինչ սկսել է գործել, բայց մենք կարողացել ենք մրցանակային տեղեր գրավել: Առաջնությանն արժանացել ենք 8 ոսկե, 11 արծաթե, 5 բրոնզե մեդալների, ինչպես նաև գավաթների և պատվոգրերի: Արդյունքները գոհացուցիչ եմ համարում: Պարուսույցը պետք է կարողանա երեխաների մոտ սեր առաջացնի դեպի պարը, պետք է լինի հետևողական և պահանջկոտ, որպեսզի կատարած աշխատանքը լինի արդյունավետ ու գոհացուցիչ»,-ավելացրել է Է. Հակոբյանը՝ հավելելով, որ ինքը և համույթի սաները պարբերաբար են մասնակցում վարպետաց դասերի, որոնք վարում են ճանաչված և աշխարհահռչակ պարուսույցներ:
Նա նշել է նաև, որ նման միջոցառումների մասնակցելը խթան է հանդիսանում, որպեսզի երեխաները ձեռք բերեն փորձ, հմտություններ և պարերի մասին նոր գիտելիքներ ստանան:
Մեր զրուցակիցը տեղեկացրել է նաև, որ օգոստոսի 21-ին պարային համույթի սաները մասնակցել են նաև Ռուսաստանի Դաշնության Սոչի քաղաքում կայացած միջազգային սպորտային պարերի առաջնությանը և արժանացել երկու ոսկե, հինգ արծաթե, երկու բրոնզե մեդալների, պատվոգրերի և գավաթների:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -33-: