Այսօր՝ նոյեմբերի 14-ին, ԱՀ կառավարության նիստրի դահլիճում Հայաստանի և Արցախի հանրային հեռուստաընկերությունների տնօրեններ Մերի Դավթյանը և Մարգարիտա Գրիգորյանը ստորագրել են համագործակցության հուշագիր:
Արցախի և Հայաստանի հանրային հեռուստաընկերությունների միջև ստորագրվել է հուշագիր
ՍՏԵՓԱՆԱԿԵՐՏ, 14 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ Հայաստանի հանրային հեռուստաընկերության տնօրեն Մարգարիտա Գրիգորյանն ասել է, որ իրենց ուսումնասիրությունների ժամանակ նկատել են, որ Արցախի հանրային հեռուստաընկերությունն ստեղծագործական առումով մեծ ներուժ ունեցող կառույց է:
«Հուշագրի շրջանակներում Հայաստանի հանրային հեռուստաընկերությունն Արցախի հանրային հեռուստաընկերության երիտասարդ կադրերի համար նախատեսում է կազմակերպել թրեյնինգներ, մասնագիտական ծրագրերի վերապատրաստում: Մեր մոտ կիրականացնենք մոնտաժային, տեխնիկական, լրագրողական և ստեղծագործական աշխատանքներ: Մենք կաջակցենք նաև հեռուստաընկերության վերազինմանը, ինչը հնարավորություն կտա փոխանակվել կադրերով, հաղորդումներով և ռեպորտաժներով: Անդրադառնալու ենք նաև իրավական, վարչակազմակերպչական հարցերին: Մեր վերջնական նպատակն է եթերի բազմազանությունը, աշխատանքի զարգացումը, փոխադարձ հաղորդումների փոխանակումը»,-մասնավորապես ասել է Մ. Գրիգորյանը:
Արցախի հանրային հեռուստաընկերության տնօրեն Մերի Դավթյանն էլ ասել է, որ հուշագիրը կարևոր դերակատարություն և նշանակություն կունենա երկու կառույցների համար:
«Հույս ունեմ, որ այս հուշագիրն իր դրական ազդեցությունն է ունենալու երկու հանրային հեռուստաընկերությունների համար: Այս փաստաթուղթը վեր է հանում ստեղծագործական, տեխնիկական, վարչարարական մի շարք լուրջ խնդիրներ, որոնց լուծումը չենք կարող իրականացնել առանջ Հայաստանի հանրային հեռուսատաընկերության աջակցության: Իմ գործընկերների անունից շնորհակալություն եմ հայտնում Հայաստանի հանրային հեռուստաընկերության տնօրինության պատրաստակամության և աջակցության համար»,-նշել է Մ. Դավթյանը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -48-:
