Իրանի նախագահ Հասան Ռոհանին հայտարարել է «թշնամական դավադրությանը հաղթելու» մասին:
Հասան Ռոհանին հայտարարել է «թշնամական դավադրությանը հաղթելու» մասին
ՍՏԵՓԱՆԱԿԵՐՏ, 20 նոյեմբերի, ԱՐՑԱԽՊՐԵՍ։ Հեռուստատեսությամբ հեռարձակված կառավարության նիստի ընթացքում նա այդկերպ է մեկնաբանել երկրում զանգվածային բողոքի ցույցերը, որոնք հաջորդել են վառելիքի գների բարձրացմանը, գրում է Azatutyun.am լրատվական կայքը:
«Իրանի ժողովուրդը կրկին փորձություններով է անցել և ցույց տվել, որ թույլ չի տա թշնամիներին օգտվել ստեղծված իրավիճակից»,- ասել է նախագահ Ռոհանին՝ հավելելով, որ մարդիկ իշխանություններից դժգոհելու իրավունք ունեն: Իրանական պետական լրատվամիջոցները հաղորդել են նաև մի շարք քաղաքներում կառավարամետ հանրահավաքների մասին:
Բողոքի ցույցերի մեկնարկից հետո, որոնց ընթացքում մի շարք քաղաքներում ոստիկանների հետ բախումներ են տեղի ունեցել, ինչպես նաև հարձակման փորձեր բանկերի և պետական կառույցների վրա, Իրանի իշխանությունները երկրում արգելափակել են ինտերնետի հասանելիությունը, ինչի պատճառով տեղի ունեցող իրադարձությունների մասին ստացվող լուրերը կցկտուր էին: Իշխանությունները հավաստիացնում են, թե ցուցարարները ցրվել են:
Amnesty International իրավապաշտպան կազմակերպությունը, վկայակոչելով ականատեսներին և ակտիվիստներին, հայտնում է, որ ցույցերը ցրելու ընթացքում ավելի քան 20 քաղաքներում սպանվել է առնվազն 106 մարդ, շուրջ 1000 հոգի ձերբակալվել է: ՄԱԿ-ի ներկայացուցիչները հայտնում են «տասնյակ» զոհերի մասին: Պաշտոնական Թեհրանը հերքում է այդ թվերը՝ չհստակեցնելով, սակայն, սեփական վիճակագրությունը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -45-:
