«Հայաստան» համահայկական հիմնադրամի կողմից կազմակերպվող ամենամյա հեռուստամարաթոնն այս տարի կանցկացվի նոյեմբերի 28-ին. մեկնարկը կտրվի Հայաստանի հանրային հեռուստաընկերությամբ, ժամը 22:00-ին։
«Ես իմ անուշ Հայաստանի․ կենարար ջուր և արև համայնքներին» խորագրի ներքո կանցկացվի Հեռուստամարաթոն-2019-ը
ՍՏԵՓԱՆԱԿԵՐՏ, 22 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Հայաստան» համահայկական հիմնադրամի մամուլի խոսնակ Արմինե Թոխմախյանն ասել է, որ ազգային նվիրատվության 22-րդ հեռուստամարաթոնը կանցկացվի «Ես իմ անուշ Հայաստանի․ կենարար ջուր և արև համայնքներին» խորագրի ներքո: 12-ժամյա համահայկական միջոցառման առաջին 4 ժամն այս տարի կանցկացվի Երևանում, իսկ հաջորդ 8 ժամը կհեռարձակվի Լոս Անջելեսից։
««Հեռուստամարաթոն-2019»-ի ընթացքում հավաքագրված գումարը կնպատակաուղղվի խմելու ջրի մատակարարման և արևային էներգիայի կիրառման ծրագրերի իրականացմանն Արցախում, ինչպես նաև Հայաստանի երեք մարզերում՝ Տավուշ, Լոռի և Շիրակ։ Ընդհանուր առմամբ, 100-ից ավել համայնքներ կդառնան ծրագրերի շահառուներ և կապահովվեն շուրջօրյա ջրամատակարարմամբ, անվճար ջեռուցմամբ ու էլեկտրաէներգիայով։ Ի դեպ, արդեն իսկ մեկնարկել են առաջին նվիրատվություններն ինչպես անհատների, այնպես էլ տարբեր կազմակերպություններ կողմից»,- նշել է Ա. Թոխմախյանը:
Հեռուստամարաթոնի ընթացքում հավաքագրված գումարը վերջնական չի լինում, քանի որ, ըստ մեր զրուցակցի, որպես կանոն, նվիրատվությունները շարունակվում են մինչև տարեվերջ: Մինչ հեռուստամարաթոնի մեկնարկն էլ անց են կացվում հեռախոսամարաթոններ: Նոյեմբերի 9–ին Բրազիլիայում մեկնարկած Ֆոնեթոն 2019–ը, որի նպատակն է գումար հավաքագրել Սաղմոսավանի համայնքային կենտրոնի կառուցման համար, արդեն իսկ հավաքել է 42.000 ԱՄՆ դոլլար: Իսկ հոկտեմբերի 20–ին Տորոնտո քաղաքում կազմակերպված տարեկան գալաճաշկերույթի ընթացքում հավաքագրվել էր 670.000 ԱՄՆ դոլար: Ճաշկերույթից ստացված հասույթը կուղղվի Ասկերանի շրջանի Պատարա գյուղում նոր դպրոցի կառուցմանը, Շուշիի Դանիել Ղազարյանի անվան երաժշտական դպրոցի վերանորոգմանը և բազմազավակ ու կարիքավոր ընտանիքի համար նոր տան կառուցմանը:
«Առաջիկայում հեռախոսամարաթոն կանկացվի Ֆրանսիայում: Նշեմ, որ «Հայաստան» համահայկական հիմնադրամի կողմից վերջերս գործարկված նոր կայքը հնարավորություն է տալիս կատարել նաև առցանց նվիրատվություններ: Կոչ ենք անում համայն հայությանը մասնակցելու համահայկական դրամահավաքին և միասնական ջանքերով զարգացնելու մեր համայնքները»,- ավելացրել է Ա. Թոխմախյանը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -13-:
