Խորհրդարանում այսօր կայացած ԱԺ ֆինանսաբյուջետային և տնտեսական կառավարման հարցերի մշտական հանձնաժողովի նիստին ԱՀ ֆինանսների նախարար Արթուր Հարությունյանն անդրադարձել է ընթացիկ տարում Արցախում ձևավորված տնտեսական միջավայրին և ներկայացրել որոշ մակրոտնտեսական կանխատեսումային գնահատականներ:
Ակնկալվում է ավելի բարձր տնտեսական աճի տեմպ, քան պլանավորվել էր 2019 թ.-ի պետբյուջեի նախագծում. ֆինանսների նախարար
ՍՏԵՓԱՆԱԿԵՐՏ, 22 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ իր խոսքում Արթուր Հարությունյանը նշել է, որ անցած 9 ամսվա արդյունքներով արձանագրված 10.4 % տնտեսական աճը, թույլ է տալիս 2019 թ.-ի համար ակնկալել ավելի բարձր տնտեսական աճի տեմպ, քան պլանավորվել է 2019 թ.-ի պետական բյուջեի նախագծում:
«Ըստ կանխատեսումների՝ 2019 թ.-ի համախառն ներքին արդյունքը կկազմի 340.9 մլրդ դրամ, իսկ տնտեսական աճը շուրջ 9.1%` 0.7 % դեֆլյատորի պայմաններում: Նման աճի տեմպի կանխատեսման համար հիմք է հանդիսացել նյութական արտադրության ճյուղերում ստեղծված ավելացված արժեքը: Մասնավորապես՝ կանխատեսվում է, որ արդյունաբերական արտադրանքի ծավալը 2019 թ.-ին կկազմի ավելի քան 152 մլրդ դրամ` նախորդ տարվա համեմատ իրական արտահայտությամբ աճելով մոտ 30 %-ով: Շինարարության ծավալը կկազմի 62 մլրդ դրամ` ապահովելով աճ 18.2 տոկոսային կետի չափով: Գյուղատնտեսության արտադրանքի ծավալը նախատեսվում է շուրջ 77 մլրդ դրամի չափով, որը նախորդ տարվա համեմատ աճելու է ավելի քան 3 %-ով»,- մանրամասնել է Ա. Հարությունյանը:
2020 թ.-ի համար կանխատեսումային համախառն ներքին արդյունքի ծավալը կկազմի 375.6 մլրդ դրամ` ապահովելով մոտ 8 % իրական աճ՝ կանխատեսվող 2 % դեֆլյատորի պայմաններում, որը, ըստ ֆինանսների նախարարի, համապատասխանում է կառավարության կողմից միջնաժամկետ հատվածում նախանշված տնտեսական աճի թիրախային մակարդակին: Գնաճի ցուցանիշը կանխատեսվել է 3 %-ի սահմաններում` +/-1.0 տոկոս տատանման թույլատրելի միջակայքով:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -41-:
