Վերջին մեկ օրում Իրաքի տարբեր շրջաններում ոստիկանության հետ ցուցարարների բախումների հետևանքով 40 մարդ է զոհվել:
Բողոքի ակցիաներ Իրաքում. մեկ օրում 40 մարդ է զոհվել
ՍՏԵՓԱՆԱԿԵՐՏ, 29 նոյեմբերի, ԱՐՑԱԽՊՐԵՍ: Այս մասին, tert.am-ի փոխանցմամբ, հաղորդում է Associated Press գործակալությունը:
Գործակալության տվյալներով՝ անկարգությունների մեծ մասը տեղի է ունեցել Իրաքի հարավում, որտեղ սպանվել է 36 ցուցարար և վիրավորվել՝ 245-ը:
Եվս չորս ցուցարար զոհվել է Բաղդադում, երբ ուժայինները կրակ են բացել ցուցարարների վրա:
Իրաքում հոկտեմբերի 1-ից սկսված բողոքի ցույցերի ընթացքում զոհվել է ավելի քան 350 մարդ, վիրավորվել են հազարավոր մարդիկ:
Նոյեմբերի 27-ին Իրաքում հակակառավարական ցույցերի մասնակիցները հրդեհել էին Նաջաֆ քաղաքում գտնվող Իրանի հյուպատոսարանը: Նրանք կարծում են, որ Իրանը միջամտում է իրենց ներքին գործերին: Հյուպատոսարանի աշխատակիցները շենքը լքել էին գաղտնի մուտքով` հրդեհից 10 րոպե առաջ:
Ցուցարարներն ի սկզբանե իշխանություններից պահանջում էին ուշադրություն դարձնել երիտասարդության շրջանում գործազրկությանը և կոռուպցիային, այնուհետև սկսեցին հնչել ներկայիս քաղաքական համակարգը փոխելու վերաբերյալ պահանջներ:
Ցուցարարները պահանջում են կառավարության հրաժարականը, ինչպես նաև կենսապայմանների բարելավում, առողջապահության և կրթության ոլորտներում, աշխատաշուկայում առկա խնդիրների լուծում, կոռուպցիայի դեմ պայքար։
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -19-:
