Razm.info-ն շարունակում է ներկայացնել Ադրբեջանի կարևոր ռազմական օբյեկտները։
Մարտունա՞կ են արդյոք Ադրբեջանի ԶՈւ «Տոչկա-Ու» հրթիռային համալիրները
ՍՏԵՓԱՆԱԿԵՐՏ, 3 դեկտեմբերի, ԱՐՑԱԽՊՐԵՍ։ Այս անգամ կանդրադառնանք «Տոչկա-Ու» օպերատիվ մարտավարական համալիրների տեղակայման վայրի և դրանց վիճակի մասին հարցերին:
Բաց աղբյուրներից հայտնի տեղեկություններով Ադրբեջանը «Տոչկա-Ու» համալիրի 3 մարտական մեքենա գնել է 2008 թվականին՝ Ուկրաինայից:
Ձեռքբերումից հետո «Տոչկա-Ու»-ի արձակման երեքական մեքենա ցուցադրվել է Բաքվում 2011 և 2013 թվականների զորահանդեսներին: Մեզ չի հաջողվել գտնել Ադրբեջանում «Տոչկա-Ու» ցուցադրող ավելի թարմ որևէ տեսանյութ, լինի դա Ադրբեջանի ՊՆ-ի ու հեռուստաալիքների պաշտոնական նյութերում, թե սիրողական նկարահանումներում: Դրանք չեն մասնակցել նաև 2018-ի զորահանդեսին: Այդ զինատեսակի մասին չի հիշատակվել նաև զորավարժությունների ժամանակ:
Տեխնիկայի չհանրայնացման նման քաղաքականությունը կարող էր բացատրվել գաղտնիության ու անվտանգության ռեժիմով, սակայն այդ տրամաբանության մեջ չէին մտնում նման կարգի այլ զինատեսակների ցուցադրությունները, օրինակ՝ LORA հրթիռի: Կամ եթե կա միայն զորահանդեսներին ցուցադրելու քաղաքականություն, ապա անհասկանալի է, թե ինչու չեն ցուցադրվել 2018-ի զորահանդեսին:
Համալիրների ֆունկցիոնալ վիճակի մասին կարող է խոսել տեղակայման վայրը: Արբանյակային լուսանկարների ուսումնասիրությունը ցույց է տալիս, որ դրանք տեղակայված են Բաքվի հարավ-արևելքում գտնվող Ղարադաղի շրջանի զորամասերից մեկում: Տարբեր տարիների արբանյակային լուսանկարներում զորամասի տարածքում երևում են տանկեր, բեռնատարներ, քարշակվող հրետանի ևն, իսկ հարևանությամբ կա տեխնիկայի գերեզմանոց:
Տեխնիկայի նման բազմազանությունը հիմք է տալիս ենթադրելու, որ սա վերանորոգման կամ սպառազինությունից հանված տեխնիկայի պահման կենտրոններից մեկն է:
«Տոչկա-Ու» հրթիռային համալիրի արձակման կամ լիցքավորման 3 միավոր մեքենա բազայի տարածքում նկատվում է առնվազն 2015-ից սկսած, ընդ որում՝ նույն վայրում, նույն կերպ կայանված: Դրանք շարունակում են այնտեղ մնալ նաև 2019-ի ամռան դրությամբ*:
Այս ամենն իր հերթին հիմք է տալիս ենթադրելու, որ «Տոչկաները» մարտունակ չեն, իսկ հնարավոր է նաև, որ հանվել են սպառազինությունից: Հասկանալի է նաև, որ այս պահին անհայտ է, թե ինչ պլաններ կարող է ունենալ Ադրբեջանի ռազմական ղեկավարությունը «Տոչկա-Ու» համակարգերը շարք վերադարձնելու վերաբերյալ։
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -49-:
