«Հանուն հայ զինվորի» հասարակական կազմակերպությունը հերթական բարեգործական ծրագրով օրերս այցելել է Պաշտպանության բանակի զորամասեր և նրանց պահպանման տակ գտնվող մարտական դիրքեր:
«Հանուն հայ զինվորի» ՀԿ-ն ՊԲ զինծառայողներին է տրամադրել անձրևապաշտպան հագուստ
ՍՏԵՓԱՆԱԿԵՐՏ, 4 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Հանուն հայ զինվորի» ՀԿ նախագահ Դավիթ Թորոսյանն ասել է, որ օժանդակ օգնության կարգով զինծառայողներին է տրամադրվել մի շարք իրեր, այդ թվում՝ անձրևապաշտպան հագուստ և մթերք։
«Ծրագրի շրջանակներում զորամիավորման ֆուտբոլային թիմին նվիրել ենք սպորտային հագուստ և անհրաժեշտ պարագաներ: Պաշտպանության բանակի N զորամասին նվիրել ենք 20 ձյուն մաքրող բահեր, 100 զույգ ռեզինե ճտքակոշիկներ, անձևապաշտպան հագուստ ու «Եվրոթերմ» ՓԲԸ-ի կողմից տրամադրված «Նոյան» հյութեր և մուրաբաներ: Պետք է նշեմ, որ մեր կողմից հայտարարված դրամահավաքին մասնակցել են մի շարք քաղաքացիներ, ովքեր վստահելով մեզ և մեր գաղափարին, ամենատարբեր չափերի գումարներով կատարել են հանգանակություն»,- ավելացրել է Դ. Թորոսյանը:
Նրա խոսքով՝ ծրագիրը շարունակվելու է, և մինչև տարեվերջ կազմակերպությունը նախատեսում է առնվազն ևս մեկ այց Պաշտպանության բանակ:
«Օգտվելով առիթից՝ մեր բոլոր զինծառայողներին մաղթում եմ բարի ծառայություն, հայրենիքին՝ խաղաղություն, մենք էլ, առաջնորդվելով մեր՝ «Ամուր թիկունք՝ հզոր բանակ» կարգախոսով մշտապես կանգնած ենք լինելու Զինված ուժերի կողքին և սատարելու ենք հայ զինվորին»,- ընդգծել է Դ. Թորոսյանը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -49-:
Լուսանկարը՝ Դավիթ Թորոսյանի
