«Վիտորիա» միջազգային բարեգործական հիմնադրամի նախաձեռնությամբ այսօր՝ դեկտեմբերի 9-ին, Ստեփանակերտի պատկերասրահում կայացել է «Արցախ՝ արարել ապրելու համար» խորագրով ժամկետային զինծառայողներ՝ Հայկ Գալոյանի և Դավիթ Բոցինյանի անհատական ցուցահանդեսը. այն նվիրված է ԱՀ մարդու հիմնարար իրավունքների, անկախության հանրաքվեի և Սահմանդրության օրվան:
Ստեփանակերտի պատկերասրահում բացվել է «Արցախ՝ արարել ապրելու համար» խորագրով ցուցահանդես
ՍՏԵՓԱՆԱԿԵՐՏ, 9 դեկտեմբերի, ԱՐՑԱԽՊՐԵՍ։ Ցուցահանդեսին ներկայացված էր 31 նկար:
«Արցախպրես»-ի թղթակցի հաղորդմամբ՝ ցուցահանդեսին բացման խոսքով հանդես է եկել Ստեփանակերտի պատկերասրահի տնօրեն Ելենա Դադայանը:
Նա կարևորել է զինծառայողների աշխատանքը և նշել, որ Հայկն ու Դավիթը ոչ միայն հսկում են հայրենիքի սահմանները, այլև իրենց մտքերն ու խոհերն են արտահայտում նկարներում:
Ե. Դադայանը շնորհակալություն է հայտնել ԱՀ մշակույթի, երիտասարդության հարցերի և զբոսաշրջության, ԱՀ պաշտպանության նախարարություններին ցուցահանդեսի կազմակերպմանն աջակցելու համար:
«Վիկտորիա» միջազգային բարեգործական հիմնադրամի տնօրեն Գայանե Գեորգյանի խոսքով՝ մշակույթը նաև հզոր զենք է՝ հայության պահպանման, ինչպես նաև համաշխարհային ասպարեզում ներկայանալու համար:«Մեր ցանկությունն է, որ այս ցուցահանդեսը դառնա սկիզբն այն միջոցառումների, որոնք շարունակելու ենք իրականացնել ԱՀ պաշտպանության բանակի հետ: Թող բոլորն իմանան, որ հայոց բանակում ծառայող զինվորներն ոչ միայն հզոր են, այլև՝ տաղանդավոր»,-մասնավորապես ասել է Գ. Գեորգյանը: 
ԱՀ նկարիչների միության նախագահ Հովիկ Գասպարյանն էլ ասել է, որ երիտասարդ նկարիչներն ունեն նկարելու ձիրք և կարողություն, պարզապես պետք է աշխատանքի միջոցով կատարելագործվեն: 
Հայկ Գալոյանը մեզ հետ զրույցում ասել է, որ սա իր երկրորդ ցուցահանդեսն է, մինչ այս ինքը Երևանում ունեցել է ևս մեկը:
«Սիրում եմ նկարել այն, ինչի մեջ գեղեցկություն եմ տեսնում: Ծառայության ընթացքում չեմ նկարում, որովհետև ազատ ժամանակն այնքան էլ շատ չի լինում: Ստեղծագործում եմ 4 տարեկանից, իսկ 14 տարեկանից հաճախել եմ Փանոս Թերլեմեզյանի անվան գեղարվեստի քոլեջ, որտեղ էլ մասնագիտացել եմ»,- հավելել է Հ. Գևորգյանը:
Դավիթ Բոցինյանի խոսքով՝ նկարելն իր համար սիրելի զբաղմունք է:
«Նկարում եմ ամեն ինչ, ներկայումս հատուկ ուղղվածություն չունեմ: Նկարելու համար պետք է հանգիստ մթնոլորտ, տրամադրություն և ստեղծագործական միտք: Ծառայությունս ավարտելուց հետո անպայման կշարունակեմ զբաղվել նկարչությամբ»,-ասել է Դ. Բոցինյանը:
Տեղեկացնենք, որ ցուցահանդեսը բաց կլինի մինչև դեկտեմբերի 12-ը ներառյալ:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -45-:
