Թուրքիայի նախագահ Ռեջեփ Թայիփ Էրդողանը հայտարարել է, որ Ռուսաստանն ու ԱՄՆ-ն չեն կատարել իրենց ստանձնած պարտավորությունները և չեն հեռացրել Սիրիայի քրդական զինված ջոկատներին Թուրքիայի սահմանամերձ գոտիներից:
Էրդողանը հայտարարել է, որ ԱՄՆ-ն ու Ռուսաստանը չեն կատարել Սիրիայի քրդերի հարցում իրենց ստանձնած պարտավորությունները
ՍՏԵՓԱՆԱԿԵՐՏ, 16 դեկտեմբերի, ԱՐՑԱԽՊՐԵՍ։ Այս մասին տեղեկացնում է թուրքական NTV հեռուստաընկերության կայքը՝ փոխանցում է Թերթ.am-ը:
Էրդողանը նշել է, որ Մոսկվան ու Վաշինգտոնը խոստացել էին դուրս բերել քրդական ջոկատները թուրք-սիրիական սահմանին ձևավորված «անվտանգության գոտուց»:
«Նրանք հայտարարում էին, որ այնտեղ ահաբեկիչներ չեն լինի, բայց նրանք այնտեղ դեռ կան»,- նշել է Էրդողանը:
Թուրք առաջնորդի խոսքերով՝ սիրիական այդ տարածքների բնակիչները «մինչև հիմա էլ Անկարայից ռազմական օգնություն են խնդրում», իսկ քրդական ինքնապաշտպանության ուժերը շարունակում են հայտարարել, որ հանդես են գալիս բոլոր քրդերի անունից:
Թուրքիայի նախագահը չի մոռացել հերթական անգամ մեղադրել Սիրիայի քրդերին՝ Թուրքիայում ահաբեկչական համարվող «Քրդական աշխատավորական կուսակցության» հետ սերտ կապեր ունենալու համար: Բացի դրանից, Էրդողանը նշել է նաև, որ քրդերը համագործակցում են նաև Բաշար ալ Ասադի իշխանության հետ՝ նրանց վաճառելով Դեր Զորից ստացված նավթը:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -18-:
