Այսօր՝ դեկտեմբերի 26-ին, ԱՀ նախագահի նստավայրում տեղի է ունեցել 2019 թվականին միջազգային և հայրենական հարթակներում բարձր արդյունքներ արձանագրած Արցախի մարզիկների ու մարզիչների պարգևատրման հանդիսավոր արարողություն:
ԱՀ նախագահը պարգևատրել է միջազգային և հայրենական հարթակներում բարձր արդյունքներ արձանագրած Արցախի մի խումբ մարզիկների ու մարզիչների
ՍՏԵՓԱՆԱԿԵՐՏ, 26 դեկտեմբերի, ԱՐՑԱԽՊՐԵՍ: Միջոցառմանը Նախագահ Սահակյանը ֆիզիկական կուլտուրայի և սպորտի զարգացման, մարզական հերթափոխի պատրաստման գործում ունեցած ավանդի համար ոլորտի մի խումբ ներկայացուցիչների հանձնել է ԼՂՀ վաստակավոր մանկավարժի, Ֆիզիկական կուլտուրայի եւ սպորտի վաստակավոր գործչի և վաստակավոր մարզչի կոչումների վկայականները:
«Արցախպրես»-ի թղթակցի հաղորդմամբ՝ իր ելույթում ԱՀ նախագահ Բակո Սահակյանն ասել է, որ 2019 թվականին Արցախի մարզիկները լուրջ հաջողությունների են հասել՝ դառնալով աշխարհի, Եվրոպայի և Հայաստանի Հանրապետության տարբեր առաջնություններում հաղթողներ ու մրցանակակիրներ:
«Բոլոր այս հաղթանակները և գոհացուցիչ են, ևպարտավորեցնող: Գոհացուցիչ են այն առումով, երիտասարդների բարձր հաղթանակի հասնելու հաստատակամության, ամուր ոգու, նրանց և, անկասկած, նրանց մարզիչների աշխատանքի մասին: Պարտավորեցնող են, որովհետեւ անհրաժեշտ է ոչ միայն պահպանել սահմանված նշաձողը, այլ նաև հետեւողականորեն կատարելագործել մասնագիտական վարպետությունը: Համոզված եմ, որ դուք ի վիճակի եք դա անել: Համոզված եմ, որովհետեւ ձեր կողմից գրանցված արդյունքները վկայում են, որ դուք աշխատասեր եք, համառ, երբևիցե չեք խուսափում պատասխանատվությամբ եք խնդիրների լուծմանը»,-ընդգծել է Բ. Սահակյանը: Նախագահն ի սրտե շնորհավորել է միջոցառման մասնակիցներին գալիք Ամանորի և Սուրբ Ծննդյան տոների կապակցությամբ՝ մաղթելով նրանց քաջ առողջություն, երջանկություն ու ամենայն բարիք, մեր հայրենիքին և ժողովրդին՝ խաղաղություն ու բարեկեցություն:
ԱՀ կրթության, գիտության և սպորտի նախարար Նարինե Աղաբալյանն իր հերթին շնորհավորել է բոլոր պարգևատրվածներին և մաղթել նորանոր ձեռքբերումներ: Նախարարն իր ելույթում մասնավորապես ասել է. «2007 թվականին 10 մարզիկներ, ովքեր մրցանակային տեղեր են զբաղեցրել ՀՀ-ն և Եվրոպայի տարբեր առաջնություններում նվերներ են ստացել մեր հանրապետության նախագահից: Նրանցից միայն 4-ն են մասնակցել Եվրոպայի ու աշխարահի առաջնությունների: Հայրենի երկրում գնահատված լինելու իրողությունն անշուշտ ոգևորեց մեր մարզիկներին ու մարզիչներին. նոր հաղթանակները չուշացան: 2011 թվականին ընդունվեց ԱՀ կառավարության որոշումը, որով սահմանվեց սպորտի բնագավառում բարձր նվաճումներ արձանագրած մարզիկների և մարզիչների դրամական պարգևատրման չափերը: 2013 թվականին ունեինք արդեն 81 մրցանակակիրներ, որոնցից 7-ը՝ Եվրոպայի և աշխարհի առաջնությունների ու միջազգային մրցաշարերի, այդ թվում Աշոտ Դանիելյանը սամբոյի աշխարհի կրկնակի չեմպիոն: 2019 թվականին արձանագրած բարձր արդյունքների համար այսօր դրամական պարգևների արժանացան 176 մարզիկներ ու մարզիչներ: Այս ցուցանիշներին պետք է ավելացնել այն, որ սպորտի բնագավառում 2009-ի համեմատ 2019-ին ունենք շուրջ 5 անգամ ավելացված բյուջե և շուրջ 10 անգամ ավելացված մրցանակային ֆոնդ, տասնյակ նոր մարզաձևեր, օր օրի համալրվող մարզադպրոցներ և տարեցտարի ավելացող մարզական կառույցներ ու մարզադաշտեր»:
Արարողությանն ԱՀ նախագահի կողմից 4 մլն 600 հազար դրամով պարգևատրված սամբոյի մեծահասակների աշխարհի առաջնությունում և Եվրոպայի գավաթի խաղարկությունում երրորդ, ՀՀ առաջնությունում՝ երկրորդ, կոխ ըմբշամարտի ՀՀ առաջնությունում առաջին տեղեր գրաված միջազգային կարգի սպորտի վարպետ Դավիթ Գրիգորյանն ասել է, որ ԱՀ նախագահական նստավայրում հանդիպման նպատակը դարձյալ արժևորելու խորհուրդ ունի: «Անցնող տարին իմ և արցախյան սպորտի ոլորտում նշանակալից էր: Մեզ մնում է միայն մեծ ջանքեր գործադրենք և հավատանք, որ 2020 թվականը ևս հաջողությունների տարի կլինի: Շնորհակալություն եմ հայտնում երկրի ղեկավարությանը մեր կատարած աշխատանքը գնահատելու և արժևորելու համար: Օգտվելով առիթից շնորհավորում եմ բոլորի գալիք Ամանորն ու Սուրբ Ծնունդը՝ մաղթելով ներդաշնակություն և նոր ձեռբերումների տարի»,-ավելացրել է Դ. Գրիգորյանը:
Օյամա-կիոկուշին կարատե-դո մեծահասակների աշխարհի և Եվրոպայի առաջնություններում առաջին տեղեր գրաված սև գոտի երկրորդ դան Արթուր Առուշանյանը պարգևտրվել է 6 մլն 750 հազար դրամաով: Նա, որպես օյամա-կիոկուշին կարատե-դո մարզաձևի մարզիչ պարգևատրվել է նաև 250 հազար դրամով:
Ա. Առուշանյանն իր խոսքում ասել է, որ 2019 թվականն իր համար՝ որպես մարզիկ և մարզիչ յուրահատուկ էր: «Որպես մարզիկ, տարին առանձնահատուկ էր, որովհետև ես դարձա Եվրոպայի հնգակի և կիոկուշին կարատեի առաջին մեծահասակների եռակի չեմպիոնը: Իսկ որպես մարզիչ, վերջապես իրականացավ իմ վաղեմի երազանքը՝ իմ աշակերտ Կարեն Կարապետյանը դարձավ եվրոպայի չեմպիոն»,- մասնավորապես ասել է Ա. Առուշանյանը և շնորհավորել բոլորի գալիք տոն օրերը:
Միջոցառմանը ներկա էին ԱՀ Ազգային ժողովի նախագահ Աշոտ Ղուլյանը, ԱՀ պետական նախարար Գրիգորի Մարտիրոսյանը, պետական այրեր և այլք:
Հարգելի՛ ընթերցող, 1-5 բալային համակարգով կարող եք գնահատել նյութի որակը՝ 10-55 կարճ համարին ուղարկելով sms հաղորդագրություն՝ նշելով համապատասխան կոդը` -38-: