ՄԱԿ-ում Իրանի մշտական ներկայացուցիչ Մաջիդ Թախտ Ռավանչին համագործակցության մասին Վաշինգտոնի առաջարկն անհնարին է անվանել և հայտարարել է, որ Թեհրանը չի կարող ընդունել այն:
ԱՄՆ-ն համագործակցության առաջարկ է արել Իրանին. իրանական կողմը հրաժարվել է
ՍՏԵՓԱՆԱԿԵՐՏ, 9 հունվարի, ԱՐՑԱԽՊՐԵՍ: Ավելի վաղ նրա ամերիկացի գործընկեր Քելլի Քրաֆթը նամակ էր ուղարկել կազմակերպության Անվտանգության խորհուրդ, որում հայտնել էր տարածաշրջանում լարվածությունը նվազեցնելու նպատակով առանց նախապայմանների բանակցությունների պատրաստակամության մասին, հայտնում է Tert.am-ը:
Ըստ Քրաֆթի` Միացյալ Նահանգները ձգտում է «կանխել միջազգային խաղաղությանն ու կայունությանն ուղղված հետագա սպառնալիքը կամ իրանական ռեժիմի կողմից էսկալացիան»:
Բացի այդ, մշտական ներկայացուցիչը հայտնել է, որ Իրանի գեներալ Ղասեմ Սոլեյմանիի սպանությունն «արդարացված է» ՄԱԿ-ի կանոնադրության 51-րդ հոդվածով, որը պետությանն ինքնապաշտպանության իրավունք է տալիս:
«Քանի դեռ Միացյալ Նահանգները շարունակում է թշնամություն հրահրել, բանակցությունները ոչ մի իմաստ չունեն»,- ասել է իրանցի դիվանագետը:
Վերջինս հավելել է, որ Միացյալ Նահանգների «աննախադեպ» պատժամիջոցները հակասում են միջազգային իրավունքի նորմերին:
Հունվարի 3-ին Բաղդադում սպանվել է Իրանի իսլամական հեղափոխության պահապանների կորպուսի գեներալ Ղասեմ Սոլեյմանին:
Իրանի գերագույն հոգևոր առաջնորդ այաթոլլահ Ալի Խամենեին խոստացել էր վրեժ լուծել Իսլամական հեղափոխության պահապանների կորպուսի «Ղոդս» հատուկ ստորաբաժանման ղեկավար, գեներալ Ղասեմ Սոլեյմանիի սպանության համար:
Լույս չորեքշաբթի Իրանի հեղափոխության պահապանների կորպուսը հայտարարել է գեներալի սպանության համար վրեժխնդրության գործողություն սկսելու մասին՝ հրթիռակոծելով Իրաքի արևմուտքում գտնվող ամերիկյան «Այն ալ-Ասադ» ռազմակայանը:
Ավելի ուշ իրանական Press TV հեռուստաալիքը հայտնել էր, որ Իրաքում ԱՄՆ ռազմաբազաների հրթիռակոծման հետևանքով 80 մարդ է զոհվել: Ամերիկյան կողմը հերքել է զոհերի մասին տեղեկությունը:
